Hezbollahu vret një e plagos tre ushtarë izraelitë përmes një sulmi me dron në Liban
Një ushtar izraelit u vra dhe tre të tjerë u plagosën nga një sulm i Hezbollahut me dron në pjesën jugore të Libanit të hënën herët në mëngjes, njoftoi ushtria izraelite, një ditë pasi forcat e saj e morën nën kontroll kalanë historike Beaufort dhe vargmalin strategjik përreth saj.
Ky është ushtari i dytë izraelit që vritet në dy ditët e fundit, në kohën kur Izraeli njoftoi se do t’i përtërijë sulmet ajrore të shkallës së lartë ndaj periferisë jugore të Bejrutit, pasi i kishte kufizuar ato për disa javë, me kërkesën e Shteteve të Bashkuara.
Ushtari i vrarë u identifikua si Adam Tzarfati, 20 vjeç, nga njësiti Maglan i Brigadës Komando, shkruan gazeta “The Times of Israel”.
Rreth orës 1 pas mesnatës, një dron i ngarkuar me lëndë shpërthyese, i lëshuar nga Hezbollahu, goditi një zonë në qytezën jugore libaneze, Yohmor, afër kalasë Beaufort, ku ishin duke operuar trupat izraelite.
Nga shpërthimi u vra Tzarfati dhe u lëndua seriozisht një ushtar tjetër. Dy ushtarë të tjerë pësuan lëndime të lehta, tha ushtria izraelite.
Ushtarët e plagosur u dërguan përmes helikopterit në një spital dhe familjet e tyre u njoftuan për rastin, thanë Forcat Mbrojtëse të Izraelit.
Trembëdhjetë ushtarë izraelitë dhe një kontraktor civil i Ministrisë së Mbrojtjes janë vrarë nga sulmet e Hezbollahut në jug të Libanit gjatë armëpushimit që nisi më 16 prill. Ushtria izraelite thotë se gjatë kësaj periudhe ka vrarë më shumë se 900 operativë të Hezbollahut.
