Gati 2.000 civilë të vrarë në Ukrainë, thotë OKB-ja
Kombet e Bashkuara e kanë regjistruar vrasjen e mbi 1.900 civilëve që nga fillimi i pushtimit rus të Ukrainës, por paralajmëruan se shifrat e vërteta janë shumë më të larta.
Komisionarja e lartë e OKB-së për të drejtat e njeriut, Michelle Bachelet, tha se nga 1.982 civilët e vrarë mes 24 shkurtit e 14 prillit, 162 janë fëmijë.
Përpos të vrarëve, Kombet e Bashkuara raportuan edhe për 2.651 civilë të plagosur, në mesin e tyre 256 fëmijë, raporton televizioni “BBC”.
Komisionarja tha se shumica e vdekjeve dhe lëndimeve janë shkaktuar nga bombardimet dhe sulmet ajrore.
Bachelet më parë është shprehur e tmerruar nga raportimet për vrasjen e civilëve në qytezën Bucha, afër kryeqytetit Kiev, duke thënë se këto raste shtrojnë pyetje serioze dhe shqetësuese për krime lufte të mundshme dhe ka bërë thirrje që të ruhen dëshmitë.
