Evropa duhet “të rritet” e ta shtojë përkrahjen për Ukrainën pas ndryshimit të Trumpit, thotë Gjermania
Evropa duhet “të rritet” dhe ta shtojë përkrahjen për Ukrainën, pas komenteve të presidentit amerikan, Donald Trump, i cili i dha mbështetje Kievit për ta rikthyer tërë territorin e pushtuar nga Rusia, tha të mërkurën ministri i Jashtëm i Gjermanisë, Johann Wadephul.
Duke folur në radion “Deutschlandfunk”, kryediplomati gjerman tha se Trumpi ka kuptuar se vetëm përpjekjet e tij kishin dështuar që ta bindnin homologun rus, Vladimir Putin, për t’i dhënë fund luftës në Ukrainë, raporton agjencia e lajmeve “Reuters”.
Komentet e Trumpit në rrjetin “Truth Social” shënuan një ndryshim të madh dhe të befasishëm të qëndrimit të presidentit amerikan, i cili më parë e kishte shtyrë Ukrainën që të dorëzonte territor për t’i dhënë fund luftës, ndërsa muajin e kaluar ia shtroi tepihun e kuq Putinit në Alaskë të ShBA-së.
Evropianët në mënyrë të përsëritur kanë thënë se “ne vërtet duam të rritemi... Ne duhet të bëhemi më sovranë” – tha ministri gjerman.
“Për këtë arsye, ne duhet të shikojmë se çfarë mund të bëjmë vetë. Mund të arrijmë shumë më shumë. Jo të gjitha shtetet evropiane e kanë përmbushur atë që ia kanë premtuar Ukrainës. Ne duhet të shikojmë se çfarë opsionesh të tjera financiare e ushtarake kemi” – shtoi Wadephul.
Sipas tij, komentet e Trumpit janë të mira për Ukrainën dhe Evropën, pasi presidenti “duhet vërtet të pranojë se përpjekjet e tij të konsiderueshme me Putinin deri më tani kanë qenë të pasuksesshme”. Sidoqoftë, zyrtari i lartë gjerman shtoi se shtimi i përpjekjeve të Evropës për sigurinë nuk do të jetë i lehtë.
Duke folur me agjencinë “Reuters” në kushte anonimiteti, dy zyrtarë paralajmëruan se Trumpi mund të jetë duke sinjalizuar se tani do t’i përkasë Evropës që ta ndihmojë Ukrainën.
Një diplomat i lartë nga Evropa Lindore tha se komentet e Trumpit për Ukrainën kanë për qëllim të tregojnë një ndryshim pozicioni dhe të dëshmojnë se “ai po fillon të çangazhohet duke e dërguar porosinë se kjo është çështje e Evropës”.
