Dy vjet luftë, ukrainasit e dërrmuar refuzojnë që të dorëzohen
Përkthehet si “briri i shtrembër”, por presidenti Zelensky e quan qytetin Kryvni Rih “shpirt dhe zemër e madhe” e tij.
“Dua që lufta të përfundojë së shpejti” – tha Vita, që jetonte afër prindërve të presidentit Zelensky. “Ai është djalë i mirë, i zakonshëm, që lufton për popullin. Unë thjesht dua që kjo luftë dhe sirenat të përfundojnë më shpejt” – shtoi ajo.
Por me përparim minimal të ukrainasve dhe mbizotërim në rritje të rusëve, fundi nuk duket në horizont dhe kjo po nxit dhe po nxitet nga grupacionet dyshuese me ndikim në Perëndim, raporton televizioni BBC.
Në Konferencën e Mynihut për Siguri, presidenti Zelensky u tha delegatëve që të mos e pyesin Ukrainën se kur do të përfundonte lufta, por “të pyesin pse Putini është ende i aftë për ta vazhduar atë”.
Kur ndihmat e bllokuara ushtarake tani po i pengojnë drejtpërdrejt forcat e tij në vijën e frontit, kjo ishte një goditje ndaj atyre që po i vonojnë armët dhe municionin për të cilat kanë nevojë dëshpërimisht ushtarët e tij.
“Unë nuk jam politikan. Ne nuk mund të pyesim se kur do të përfundojë lufta prapë. Duhet të luftojmë; nuk do të tolerojmë asgjë tjetër. Njerëzit janë shumë të zemëruar tani” – tha Valeriy, burrë në të tetëdhjetat, para një dyqani ushqimor.
Dëshira për t’u mbrojtur ka mbetur pothuajse e paprekur që nga ai mëngjes i 24 shkurtit të vitit 2022. Përballë një të panjohure tmerruese, mijëra njerëz u paraqitën vullnetarë për t’iu bashkuar luftës së Ukrainës.
Vështrimi i botës u kthye nga Kievi. Profili dhe popullariteti i Zelenskyt shkoi në qiell, pasi ai i kishte refuzuar ofertat për t’u evakuuar dhe qëndroi në Kiev.
“Unë kam nevojë për municion, jo për vozitje” – tha ai në atë që tani cilësohet si thënie ironike. Nevojat e tij nuk kanë ndryshuar, por apelet e presidentit e kanë humbur ndikimin e tyre elektrifikues.
Një kundërsulm i dështuar më 2023 çoi te pyetje të sikletshme për atë nëse Ukraina është e aftë për ta çliruar territorin e vet.
Dyshuesit republikanë në ShBA po e pengojnë aftësinë e Ukrainës për të luftuar përmes bllokimit të miliarda dollarëve ndihma ushtarake. Kievi thotë se më shumë trupa në vijnë e frontit po vdesin si rezultat i mungesës së armëve dhe municionit që po harxhohet.
Në të njëjtën kohë, Rusia i ka vazhduar përpjekjet e luftës dhe aleatët e saj, Irani dhe Koreja Veriore, po e furnizojnë me raketa për t’i goditur qytetet ukrainase.
Dekada ruse e agresionit ndaj Ukrainës nisi me aneksimin e Krimesë më 2014 dhe pastaj u zgjerua në luftë në lindje të vendit. Në ditën e 731-të të pushtimit të plotë, tani është një lloj tjetër i luftës.
Edhe pse të jashtëzakonshme, sukseset e Ukrainës në mbrojtje dhe degradimi i forcave detare ruse nuk e kanë ndryshuar rrjedhën e luftës në favor të Kievit.
