Detajet: Sulmet amerikane godasin Iranin për natën e shtatë radhazi
Ushtria e Shteteve të Bashkuara njoftoi se mbrëmë vazhdoi me sulme të tjera ndaj Iranit, që nga momenti kur Presidenti Donald Trump deklaroi se marrëveshja e përkohshme e armëpushimit kishte "marrë fund".
Komanda Qendrore e SHBA-së (CENTCOM) bëri të ditur se forcat e saj goditën "objekte të mbikëqyrjes, infrastrukturë logjistike ushtarake, depo nëntokësore të armëve dhe kapacitete detare".
Irani tha se u kundërpërgjigj duke goditur aleatët e SHBA-së në rajon, përfshirë Kuvajtin, i cili njoftoi se një tjetër central i energjisë elektrike dhe impiant i distilimit të ujit ishte goditur, pas një sulmi të ngjashëm një ditë më parë.
"Një tjetër impiant i prodhimit të energjisë elektrike dhe distilimit të ujit u godit nga një sulm armiqësor, i cili shkaktoi një zjarr në një nga komponentët e impiantit", deklaroi Ministria e Energjisë Elektrike dhe Ujit e Kuvajtit, duke shtuar se disa njësi të prodhimit të energjisë u çaktivizuan.
Ushtria e Jordanisë gjithashtu njoftoi se kishte interceptuar 10 raketa iraniane që ishin lëshuar drejt hapësirës së saj ajrore gjatë natës. Nuk u raportuan dëme. Edhe Bahreini bëri të ditur se mbrojtja e tij ajrore kishte "zmbrapsur" sulmet iraniane.
CENTCOM tha se i përfundoi sulmet në orën 21:30 sipas kohës lindore të SHBA-së (02:30 sipas orës britanike), pas disa orësh operacionesh.
"Në operacion u përdorën avionë luftarakë, dronë ajrorë dhe anije luftarake, si dhe mjete të tjera ushtarake", thuhet në deklaratën e CENTCOM-it, sipas BBC.
Sipas mediave shtetërore iraniane, shpërthime u dëgjuan në qytetin qendror të Jazdit, në ishullin Qeshm dhe në portin e Bandar Abbasit, pranë Ngushticës së Hormuzit.
