“Despoti” Trump e uron dhe e përgëzon “komunistin” Mamdani – i lënë anash fyerjet, bëhen gojëmjaltë

Presidenti i Shteteve të Bashkuara, Donald Trump, e priti të premten në Shtëpinë e Bardhë kryetarin e ri të Nju-Jorkut, Zohran Mamdani. Dy politikanët i lanë për një çast anash dallimet dhe u treguan “diplomatë” para gazetarëve.

“Sa më mirë që ia del, aq më i lumtur jam” – tha Trumpi, duke iu referuar atij që para disa ditëve e kishte quajtur “komunist”.

Në anën tjetër, “komunisti” Mamdani tha se pati një takim “produktiv” me presidentin që më parë e kishte quajtur “despot”.

“Unë e çmova takimin me presidentin, siç thashë, ishte një takim produktiv i përqendruar në një vend të admirimit dhe dashurisë së përbashkët, qytetit të Nju-Jorkut” – tha Mamdani, raporton televizioni CNN.

Trumpi e uroi Mamdanin për fitoren në zgjedhje para gazetarëve pas takimit që u zhvillua me dyer të mbyllura.

Para fitores së Mamdanit, Trumpi kishte kërcënuar se do t’ia ndalte fondet federale Nju-Jorkut, nëse politikani që e uroi të premten do ta fitonte garën.

“Porsa patëm një takim të mrekullueshëm, një takim vërtet të mirë, shumë produktiv” – tha Trumpi i ulur në karrige, ndërsa Mamdani po qëndronte në këmbë, pranë krahut të tij të djathtë.

“Një gjë e përbashkët – ne duam që ky qyteti ynë, që ne e duam, t’ia dalë mbanë shumë mirë” – shtoi presidenti amerikan.