Çka s’pamë nga vizita: Putini e Kimi e vozisin njëri-tjetrin, koreani ia jep dy dhurata të njëjta
Edhe pse ishte mysafir, presidenti rus, Vladimir Putin, mësa duket nuk përtoi që ta voziste veturën “Aurus” gjatë vizitës në Kore të Veriut. Pasagjerin e pati goxha të rëndësishëm – udhëheqësin e vendit nikoqir – Kim Jong Un.
Në një fotografi të publikuar nga agjencia shtetërore koreane e lajmeve, KCNA, Putini shihet duke vozitur e duke folur diçka, ndërsa Kimi duke qeshur.
Agjencia “Reuters”, duke e cituar agjencinë KCNA, raportoi se Kimi i dha dhuratë presidentit rus dy qen të racës lokale, Pungsan.
Në një fotografi të publikuar nga agjencia shtetërore e lajmeve, Kimi dhe Putini shihen duke iu afruar dy qenve të bardhë, të cilët kishin litarë të kuq e të kaltër dhe ishin vendosur brenda një rrethoje druri, në hapësirë të gjelbëruar.
Qentë e racës Pungsan janë qen gjuetie dhe janë autoktonë në një rajon në pjesën veriore të Koresë së Veriut.
Më pas, raportohet se Kimi i dha një kali karota për të ngrënë, ndërsa Putini ia preku kokën kafshës.
Kimi ia kishte dhënë dy qen të racës Pungsan edhe ish-presidentit të Koresë Jugore, Moon Jae-in, në vitin 2018, kur marrëdhëniet mes dy vendeve ishin përmirësuar.
