Cilat kanë qenë gabimet ushtarake të Rusisë në Ukrainë?

Rusia ka një nga forcat e armatosura më të mëdha dhe më të fuqishme në botë, por kjo nuk ka qenë e dukshme në pushtimin e saj fillestar të Ukrainës. Shumë analistë ushtarakë në Perëndim janë befasuar nga performanca e saj në fushë-betejë deri më tani, ku disa prej tyre atë e kanë përshkruar edhe si të mjerë.

Përparimet e saj ushtarake duket se kanë ngecur në masë të madhe dhe disa tani pyesin nëse mund të rikuperohet nga humbjet që ka pësuar. Këtë javë, një zyrtar i lartë ushtarak i NATO-s i tha BBC-së, "rusët qartazi nuk i kanë arritur qëllimet e tyre dhe ndoshta nuk do t'i arrijnë në fund të ditës".

Pra, çfarë ka shkuar keq? Për këtë janë pyetur ushtarakë perëndimorë dhe zyrtarë të inteligjencës, për gabimet që ka bërë Rusia.

Supozime të gabuara

Gabimi i parë i Rusisë ishte nënvlerësimi i forcës së rezistencës dhe aftësive të forcave më të vogla të armatosura të Ukrainës. Rusia ka një buxhet vjetor të mbrojtjes prej më shumë se 60 miliardë dollarë, krahasuar me shpenzimet e Ukrainës prej pak më shumë se 4 miliardë dollarë.

Në të njëjtën kohë, Rusia dhe shumë të tjerë duket se i kanë mbivlerësuar fuqitë e veta ushtarake. Presidenti Putin kishte nisur një program ambicioz modernizimi për ushtrinë e tij dhe ai gjithashtu mund të ketë besuar këtë më shumë dhe më shpejtë se sa duhet.

Një zyrtar i lartë ushtarak britanik tha se pjesa më e madhe e investimit të Rusisë ishte shpenzuar në arsenalin dhe eksperimentimin e saj të madh bërthamor, që përfshinte zhvillimin e armëve të reja si raketat hipersonike. Rusia supozohet të ketë ndërtuar tankun më të avancuar në botë - T-14. Por ndërsa është parë në Paradën e Ditës së Fitores në Moskë në Sheshin e Kuq, ajo ka munguar në betejë në Ukrainë. Shumica e asaj që Rusia ka vënë në terren janë tanke të vjetra T-72, transportues të blinduar të personelit, artileri dhe raketahedhës.

Në fillim të pushtimit, Rusia kishte një avantazh të qartë në ajër, me avionin luftarak që kishte lëvizur pranë kufirit, duke tejkaluar numrin e forcave ajrore të Ukrainës me më shumë se tre me një. Shumica e analistëve ushtarakë supozuan se forca pushtuese do të fitonte shpejt epërsinë në ajër, por nuk e bëri as atë. Mbrojtja ajrore e Ukrainës është ende efektive, duke kufizuar aftësinë e Rusisë për të manovruar, por sigurisht ajo u ndihmua edhe nga vendet tjera si SHBA, Mbretëria e Bashkuar, Turqia e shumë vende të tjera.

Moska gjithashtu mund të ketë supozuar se forcat e saj speciale do të luanin një rol të rëndësishëm.

Një zyrtar i lartë i inteligjencës perëndimore i tha BBC-së se Rusia mendonte se mund të dislokonte njësi më të lehta, si parashutistët Spetsnatz dhe VDV. Por në ditët e para sulmi i tyre me helikopter në aeroportin Hostomel, pak jashtë Kievit, u zmbraps, duke i mohuar Rusisë një urë ajrore për të sjellë trupa, pajisje dhe furnizime shtesë në teren.

Në vend të kësaj, Rusisë i është dashur të transportojë furnizimet e saj kryesisht me rrugë tokësore. Kjo ka krijuar bllokime trafiku dhe ngecje të automjeteve të rënda në baltë, të cilat ishin objektiva të lehta për forcat ukrainase për t'u zënë në pritë.

Ndërkohë, kolona e gjatë e blinduar e Rusisë nga veriu që u kap nga satelitët nuk ka arritur ende të rrethojë Kievin. Përparimet më të rëndësishme kanë ardhur nga jugu, ku ajo ka mundur të përdorë linjat hekurudhore për të rifurnizuar forcat e saj. Sekretari i Mbrojtjes i Mbretërisë së Bashkuar, Ben Wallace, i tha BBC-së se forcat e Presidentit Putin "kanë humbur momentin".

Humbje dhe moral të ulët

Rusia kishte grumbulluar një forcë prej rreth 190,000 trupash për këtë pushtim dhe shumica e tyre tashmë janë angazhuar në betejë. Por ata kanë humbur tashmë rreth 10% të asaj force. Nuk ka shifra të besueshme për shkallën e humbjeve të Rusisë apo Ukrainës. Ukraina pretendon se ka vrarë 15,000 trupa ruse, megjithëse SHBA vlerëson se është ndoshta gjysma e këtij numri.

Zyrtarët perëndimorë thonë se ka gjithashtu dëshmi të rënies së moralit midis luftëtarëve rusë, me një që thotë se ishte "shumë, shumë, i ulët". Një tjetër tha se trupat ishin "të ftohtë, të lodhur dhe të uritur", pasi ata kishin pritur tashmë në dëborë për javë të tëra në Bjellorusi dhe Rusi përpara se t'u jepej urdhri për të pushtuar.

Rusia tashmë është detyruar të kërkojë më shumë trupa për të kompensuar humbjet e saj. Zyrtarët perëndimorë besojnë se është gjithashtu "shumë e mundshme" që trupat e huaja nga Siria të bashkohen së shpejti në luftë, së bashku me mercenarë nga grupi i saj sekret Wagner.

Furnizimet dhe logjistika

Ekziston një thënie e vjetër ushtarake që amatorët flasin për taktika ndërsa profesionistët studiojnë logjistikë. Ka prova që Rusia nuk e ka konsideruar mjaftueshëm atë. Kolona të blinduara kanë mbetur pa karburant, ushqim dhe municione. Automjetet janë prishur dhe janë lënë të braktisura, më pas janë tërhequr nga traktorët ukrainas.

Zyrtarët perëndimorë besojnë gjithashtu se Rusisë mund t'i mbarojë disa municione. Ajo tashmë ka gjuajtur midis 850 dhe 900 municione precize me rreze të gjatë.

Zyrtarët amerikanë kanë paralajmëruar se Rusia i është afruar Kinës për ta ndihmuar në adresimin e disa prej mungesave të saj me armë.

Në të kundërt, ka pasur një furnizim të qëndrueshëm me armë nga Perëndimi për Ukrainën, gjë që ka qenë një nxitje për moralin e saj. SHBA sapo ka njoftuar se do të sigurojë 800 milionë dollarë shtesë në mbështetje të mbrojtjes. Si dhe më shumë raketa antitank dhe kundërajrore, pritet të shkojnë në drejtim të Ukrainës.

Zyrtarët perëndimorë ende paralajmërojnë se presidenti Putin mund të "dyfishojë brutalitetin e tij ndaj Ukrainës". Ata thonë se ai ka ende fuqi të mjaftueshme zjarri për të bombarduar qytetet e Ukrainës për një "periudhë të konsiderueshme kohore".

Pavarësisht pengesave, një zyrtar i inteligjencës tha se presidenti Putin "nuk ka gjasa të pengohet dhe në vend të kësaj mund të përshkallëzohet. Ai ka të ngjarë të mbetet i sigurt se Rusia mund ta mposhtë ushtarakisht Ukrainën". /Nacionale/