Zbarkimi i hetuesve në IML për gjetjen e mostrave të Astrti Deharit, Ministria e Drejtësisë hesht

Gazeta Nacionale sot gjatë ditës ka raportuar se janë gjetur mostrat e Astrit Deharit dhe se të njëjtat janë kthyer në Institutin e Mjekësisë Ligjore në Prishtinë.

Pas raportimeve të Nacionales, edhe disa media të tjera kanë raportuar për këtë gjë, duke u referuar në burimet e tyre.

Pavarësisht lajmeve dhe reagimeve të shumta për këtë temë, Ministria e Drejtësisë ka heshtur.

Gazeta Nacionale ka tentuar të marrë një përgjigje nga ministrja e Drejtësisë, Albulena Haxhiu në lidhje me raportimet se janë gjetur mostrat e Astrit Deharit, mirëpo deri në publikimin e këtij lajmit, e njëjta nuk ka kthyer përgjigje.

Gazeta Nacionale për këtë çështje i ka shkruar edhe Prokurorisë Speciale, por deri në momentin e publikimit të shkrimin nuk ka marrë ndonjë përgjigje.

Nacionale ka tentuar të kontaktojë edhe me prokurorin e rastit, Afrim Shefkiu, por as ky nuk e ka hapur telefonin.

Çka ka raportuar Nacionale?

Gjatë ditës së premte Gazeta Nacionale ka raportuar se janë gjetur mostrat e Astrit Deharit. Kjo dyshohet se ka ndodhur në Institutin e Mjekësisë Ligjore.

Lajmin e kanë konfirmuar për gazetën Nacionale disa burime të afërta me zhvillimet.

Sipas burimeve, një numër hetuesish kanë zbarkuar në Institutin e Mjekësisë Ligjore dhe kanë kryer hetimet.

Burime të afërta me zhvillimet i kanë thënë Nacionales se sipas dyshimeve, mostrat e Astrit Deharit janë gjetur nga Ekipi i Inventarizimit.

“Ekipi i inventarizimit i ka gjetur mostrat. Gjatë fazës së parë të inventarizimit janë gjetur vetëm mostrat e urinës, në inventarizimin e dytë kanë qenë mostrat komplet.” - kanë deklaruar këto burime për Nacionalen.

Nacionale ka tentuar kontaktin me U.D drejtorin e IML-së, Ditor Haliti, por ai nuk është përgjigjur.

Kurse, drejtoresha e laboratorit të Toksikologjisë, Flutura Goga, ka thënë për Nacionalen se gjendet në pushim pasi ka rast vdekjeje.

“Tash dëgjova. Jam në pushim pasi kam rast vdekje”, tha ajo shkurtimisht.

Nacionale ka mësuar se hetuesit kanë intervistuar edhe disa prej punëtorëve në IML.

Nacionale kishte raportuar para rreth një viti se ishte gjetur një pjesë e mostrave të Astrit Deharit.

Një burim brenda Institutit të Mjekëses Ligjore(IML), kishte treguar për gazetën se mostrat janë kthyer aty ku kanë qenë më herët.

“Janë gjetur disa mostra të Astrit Deharit. Ato janë gjetur në objekt dhe janë kthyer aty ku kanë qenë më herët”, kishte thënë burimi.

Zhdukjen e këtyre mostrave e kishte njoftuar Ministrja e Drejtësisë, Albulena Haxhi.

Në një konferencë për media, ajo kishte thënë se menjëherë ka njoftuar prokurorinë për rastin.

“Duke pasur parasysh ndjeshmërinë rastit, mbrëmë në orët e vona jam njoftuar që janë zhdukur mostrat e Astrit Deharit, nga laboratori, kam njoftuar ushtruesin e kryeprokurorit Besim Kelmendi. Në rasat e epruveta kanë qenë 15 epruveta me gjak, një e urinës dhe një epruvetë e lukthit”, ka thënë Haxhiu.

Ajo kishte treguar se në atë hapësirë qasjen e njerëzve ishte e kufizuar.

“Ky akt është vërejtur dje gjatë bartjes së mostrave nga frigoriferët e vjetër në frigoriferët e rinj, por jam e bindur se ka qenë çështje kohe që ata që e kanë orkestruar do ta plasonin si një veprim dëmtues të procesit në tërësi” kishte thënë ministrja.

Zhdukja e mostrave kishte nxitur reagime të shumta në vend.

Ministrja e Drejtësisë kishte suspenduar katër zyrtar të IML-së për këtë çështje, ndërsa prokuroria kishte nisur hetimet, duke intervistuar njerëz.