Apeli e lë në paraburgim Naser Hafizin
Gjykata e Apelit e ka lënë në paraburgim U.D drejtorin e Autoritetit të Pellgjeve, Naser Hafizi.
Apeli ia ka konfirmuar masën e paraburgimit prej 30 ditësh Hafizit, si i dyshuar për keqpërdorim të detyrës zyrtare dhe shpërlarjes parash.
Gjykata Themelore në Prishtinë përmes vendimit të 11 tetorit 2024 ia caktuar masën e paraburgimit në kohëzgjatje prej 30 ditësh, Naser Hafizit nën dyshimin për “Keqpërdorim të detyrës apo autoritetit zyrtar”, “Shpëlarje të parave” dhe “Mosraportim apo raportim të rremë të pasurisë të të ardhurave, dhuratave, dobisë tjetër pasurore ose i detyrimeve financiare”, raporton “Betimi për Drejtësi“.
Ndaj këtij vendimi, ankesë kishte ushtruar avokati Mehmeti për shkak të shkeljes esenciale të dispozitave të procedurës penale dhe vërtetimit të gabuar të gjendjes faktike. Kishte propozuar që Apeli ta ndryshojë aktvendimin e ankimuar ashtu që të pandehurit t’i ndërprehet masa e paraburgimit ose t’i caktohet një masë më e butë.
Kurse, Prokuroria e Apelit përmes parashtresës kishte propozuar që të refuzohet si e pabazuar ankesa e mbrojtësit të Hafizit, ndërsa të vërtetohet aktvendimi i ankimuar.
Gjykata e Apelit përmes aktvendimit të 18 tetorit 2024, ka gjetur se ankesa e mbrojtjes është e pabazuar.
Shkalla e dytë ka konstatuar se vendimi i Themelores është i drejtë dhe i bazuar në ligj. Edhe Apeli vlerëson se ekziston dyshimi i bazuar se Hafizi në cilësinë e zëvendësuesit të drejtorit të ARPL-së në MMPHI ka keqpërdorur detyrën zyrtare, me dashje ka tejkaluar kompetencat e tij duke vepruar në kundërshtim të plotë me rregullat dhe procedurat e caktuara në Ligjin për Ujërat e Kosovës, si dhe Udhëzimin Administrativ për strukturën e pagesave ujore, duke anashkaluar në tërësi raportin e grupit ministror, i cili ishte formuar me qëllim të llogaritjes së borxheve të ambalazhuesve ndaj ARLP-së.