Anise në Kosovë erdhi për të marrë pjesë në një takim të të rinjve socialist, ish-kryeministri grek, George Papandreou u prit edhe në Qeverinë e Kosovës.

Kryeministri në largim, Albin Kurti e ka pritur atë në Zyrë të Kryeministrit.

Aty, thuhet se Kurti me tashmë deputetin grek, kanë folur për bashkëpunimin mes dy vendeve.

“Diskutuan rreth bashkëpunimit bilateral në rritje ndërmjet Kosovës dhe Greqisë, zhvillimeve të fundit në Kosovë dhe rajon, si dhe bashkëpunimin mes partive simotra e dy subjekteve politike që drejtojnë.

z. Papandreou po qëndron në Prishtinë, ku gjatë paradites, bashkë me kryeministrin Kurti, mori pjesë në hapjen e punimeve të Këshillit Botëror të Unionit Ndërkombëtar të të Rinjve Socialistë (IUSY)” – thuhet në njoftim të Zyrës së Kryeministrit.

Kryesia e LDK-së në Mitrovicë ka njoftuar se ka propozuar Gëzim Plakollin për kryetar të kësaj komune.

Në një njoftim për media, dega e LDK-së në Mitrovicë ka thënë se konfirmon besimin e plotë te Plakolli.

“Në mbledhjen e fundit të Kryesisë së LDK-së Dega në Mitrovicë, është propozuar zyrtarisht Gëzim Plakolli si kandidat për Kryetar Komune.

Me këtë vendim, dega e LDK-së në Mitrovicë konfirmon besimin e plotë në përvojën, angazhimin dhe vizionin e z. Plakolli për të udhëhequr Mitrovicën drejt zhvillimit dhe ndryshimit të shumëpritur” – thuhet në njoftim.

Mbeturina të shumta shihen në lagjen “Kalabria”, ashtu si edhe në pjesë të tjera të kryeqytetit.

Në disa pamje të dërguara nga lexues të Nacionales, shihet se si ka qenë situata sot atje.

Theksojmë se kompania “Pastrimi” ka ndërprerë mbledhjen e mbeturinave në Prishtinë, kjo pas borxhit rreth 2.7 milionë euro nga komuna.

Në një njoftim të publikuar së fundi, kjo kompani njoftoi se nuk mund të vazhdojë ofrimi i shërbimeve.

“Për më shumë se pesë muaj, Komuna nuk ka përmbushur obligimet financiare ndaj kompanisë, pavarësisht kërkesave tona të vazhdueshme dhe paralajmërimeve të përsëritura. Kjo situatë e ka bërë të pamundur mbulimin e kostove operative dhe vazhdimin e normal të ofrimit të shërbimeve” – u tha në një njoftim.

Ambasadori i Gjermanisë në Kosovë, Jorn Rohde ka njoftuar se sot bashkë me përfaqësues të vendeve të QUINT-it dhe Bashkimit Evropian, kanë takuar Flutura Kusarin dhe Xhemajl Rexhën.

Në një shkrim në rrjete sociale, ai ka thënë se në takim u diskutua për situatën e medias në Kosovë.

Rohde ka shtuar se gazetaria e lirë dhe e pavarur është gurthemel i demokracisë.

“Këtë mëngjes, përfaqësuesit e Quint-it dhe BE-së 🇪🇺 u takuan me Flutura Kusarin dhe Xhemajl Rexhën, duke diskutuar situatën e medias dhe shtypit në Kosovë. Gazetaria e lirë dhe e pavarur është një gurthemel i demokracisë dhe meriton të respektohet dhe të mbrohet” – ka shkruar ai.

Shqipëria dhe Franca kanë nënshkruar marrëveshje për teknologji, derisa raportohet se presidenti francez, Emmanuel Macron do të qëndrojë edhe sonte në Tiranë.

Nga pamjet “live”, shihet se presidenti francez e ka komentuar krevatën e kryeministrit shqiptar, duke i thënë “kjo qenka e mirë”.

Më pas, ata kanë vijuar brenda Piramidës.

“Piramida e Tiranës - Për t'i dhënë dritën jeshile “Ecole 42”, shkollës prestigjioze franceze të kodimit, e pranishme në 31 shtete, e tanimë edhe në Shqipëri, si një strukturë e dedikuar drejt botës së teknologjisë pa kufi moshe dhe profesioni” – ka shkruar Rama në Facebook.

Asociacioni i Gazetarëve të Kosovës i ka reaguar kryediplomates në largim, Donika Gërvalla, pas së paku dy sulmeve që ua ka bërë të premten gazetarëve.

AGK ka bërë thirrje nga VV-ja dhe partnerët e saj, si Guxo, që ta ndalin retorikën nxitëse.

Reagimi i plotë:

Deputetja, Donika Gërvalla Schëarz ka sulmuar gazetarët dhe mediat, në së paku dy postime në Facebook, teksa ka mbrojtur deputetin tjetër, Faton Peci.

Ministrja në detyrë e Punëve të Jashtme ka shkruar, “Ju, që veç gazetarë nuk jeni, vazhdoni me gënjeshtra e sajime”, dhe gjithashtu “E hajt mos i quaj këta, që veç gazetarë nuk janë, mercenarë të gënjeshtrës dhe mashtrimit”.

AGK-ja e dënon këtë gjuhë të papranueshme të zyrtares së lartë të partisë politke që ka udhëhequr më Kosovën në 4 vitet e fundit, dhe i kujton se sulme të tilla të orkestruara kanë ndikuar që Kosova të renditet më se keqi në rajon sa i përket lirisë së mediave.

AGK-ja i bën thirrje Vetëvendosjes dhe aleatëve të saj të vegjël, që të ndalojnë me retorikën nxitëse kundër mediave dhe gazetarëve.

Kryeministri shqiptar, Edi Rama ka thënë “nuk u martuam sot”, kur u pyet mbi integrimin e Ballkanit Perëndimor dhe Shqipërisë në Bashkimin Evropian.

Gazetarët pyetën Ramën mbi atë se çka u diskutua për integrimin e rajonit në bllok.

“Nuk u martuam sot” – tha shkurt kryeministri shqiptar.

“Ju e dëgjuat dje Presidentin e KIE që shpjegoi gjatë e gjerë se çfarë është gati të bëjë BE. Por ne duhet të bëjmë atë që na takon. Është e bazuar në meritë dhe mbështetet në procesin me grupkapituj e kapituj, që ndjekin njëri-tjetrin. Është e rëndësishme për ne që kemi një sfidë në tryezë. Një agjendë për të përmbyllur negociatat, mendoj që mund ta bëjmë. Shtetet anëtare janë për të na vëzhguar dhe për t’u siguruar që gjithçka mbështetet në rezultat. Por ky moment është fantastik, na duhet të përfitojmë nga ky moment dhe të shkojmë më tej” – vazhdoi tutje ai.

Deputetja e Lidhjes Demokratike të Kosovës, Hykmete Bajrami i ka reaguar deputetes së Vetëvendosje, Artane Rizvanolli, pasi publikoi një vendim të miratuar për energjinë elektrike në kohën kur kryeministër ishte Is Mustafa.

Bajrami në një shkrim në llogarinë e saj në Facebook, ka thënë se ky Projektligj kishte të bënte me konkurencën e lirë.

“Pra, paskan publiku vendimin kur është miratuar Projektligji për Energjinë Elektrike të nënshkruar nga Kryeministri Isa Mustafa, i cili pas ansjë dyshim është kryeministri më i suksesshmi që ka pasë Republika e Kosovës.

Po t’i kujtoj edhe disa gjëra deputete Rizvanolli sidomos ato që lidhen me Ligjin që po e apostrofoni: Ky Ligj kërkon të ketë konkurrencë të lirë, nëse zbatohet siç duhet lufton mafien energjetike që e keni instaluar në Kosovë, për me tepër ky Ligj kërkon të ketë konkurrencë para se të vendosën konsumatorët në treg të lirë.

E qysh ''treg i lirë'' kur vetëm KESCO shet energji? Ku po e shihni konkurrencën e lirë?” – ka shkruar ajo.

Tutje, Bajrami i ka kërkuar Rizvanollit që ta lexojë Ligjin për Energjinë Elektrike.

“Përpos kësaj deputete,

Lexo Ligjin për Energjinë Elektrike e në veçanti Nenin 37 të tij, duhesh me qënë në dijeni për interpretimin që po i bën KESCO me udhëzime të ZRRE-së këtij Neni, sepse përpos që s'ka konkurrencë, jashtëligjshëm kompanitë po përjashtohen nga shërbimi universal.

Neni 37, paragrafi 2 thotë se për të qënë përfitues të shërbimit universal duhet të përmbushësh njërin nga kriteret: ose qarkullim nën 10 milionë Euro ose biznesi t’i ketë më pak se 50 punëtorë, ndërkohë që KESCO po i përjashton kompanitë nga shërbimi universal nëse nuk përmbushin të dy këto kritere”.

Bashkëkryetarja e Guxo, Donika Gërvalla e ka cilësuar si “ministër të shkëlqyeshëm” Faton Pecin.

Në një shkrim në llogarinë e saj në Facebook, Gërvalla ka ngritur pretendime për “fushatë të orkestruar dhe sistematike” ndaj Pecit.

“Faton Peci është ministër i shkëlqyeshëm, sepse është punëtor i madh, i ndershëm deri në palcë, i guximshëm si rrallë kush, i ditur, i edukuar, plot integritet dhe dinjitet.

Fushatat e orkestruara dhe sistematike të muajve të fundit kundër Fatonit, para dhe pas zgjedhjeve të 9 shkurtit, janë produkt i krimit të organizuar dhe përfaqësuesve dhe pronarëve të bizneseve mediatike, që veç gazetarë nuk janë. Shtrembërimet, trillimet dhe gënjeshtrat e tyre të hapura janë shprehja më e qartë e dëshpërimit të atyre që tentuan me sajime e fabrikime të njollosin ministrin jo vetëm të suksesshëm të qeverisë Kurti, por edhe shumë të dashur për qytetarët” – ka shkruar ajo.

Tutje, ajo ka pretenduar se “qytetari e njeh Fatonin”.

“Këto fushata të rreme dhe denigruese nuk pijnë ujë në Kosovë. Qytetari e njeh mirë Fatonin, e vlerëson punën dhe ndershmërinë e tij dhe prandaj me votë e ka ngritur aty ku e meriton, në mesin e më të votuarve në Republikën e Kosovës.

Jemi të ndërgjegjshëm për sfidat që kemi kapërcyer, por edhe për ato që na presin gjatë

4-vjeçarit të ardhshëm. Por nuk ka fushatë njollosëse, nuk ka kërcënim e as sulm që na ndal. Ju, që veç gazetarë nuk jeni, vazhdoni me gënjeshtra e sajime, e ne po vazhdojmë me punët e shumta që kemi përpara, me nder, dinjitet e integritet. E në fund, qytetari është ai që na e bën vlerësimin”.

Aktivisti i PSD-së, Nol Nushi, e ka kritikuar vendimin e Ministrit të Kulturës, Hajrulla Çeku, për emërimin e Këshillit Drejtues të Teatrit Kombëtar të Kosovës.

Pas publikimit të shkrimit të Nacionales për këtë çështje, ai ka thënë se VV-ja po e vazhdon traditën e punësimit të njerëzve të saj nëpër institucione publike.

“Tradita vazhdon, 5 prej 7 anetareve te Bordit te Teatrit Kombetar jane njerez qe publikisht jane me Partine Vetevendosje!”, ka shkruar ai në profilin e tij në “Facebook”.