Southgate jep dorëheqje nga Kombëtarja e Anglisë
Gareth Southgate ka dhënë dorëheqje nga pozita e trajnerit të Kombëtares së Anglisë, dy ditë pasi humbi finalen e Kampionatit Evropian me Tre Luanët ndaj Spanjës.
Tre Luanët humbën 2:1 në Berlin të dielën - humbja e tyre e dytë radhazi në finalen e Euros, pasi u mundën me penallti nga Italia në Wembley tre vjet më parë.
Southgate, 53 vjeç, drejtoi vendin e tij për 102 ndeshje në tetë vjet në krye. Kontrata e tij ishte caktuar të skadonte më vonë këtë vit.
“Si një anglez krenar, ka qenë nderi i jetës sime të luaja për Anglinë dhe të drejtoja Anglinë”, tha Southgate.
“Kjo ka qenë gjithçka për mua dhe kam dhënë gjithçka. Por është koha për ndryshim dhe për një kapitull të ri."
Shefi ekzekutiv i Federatës së Futbollit Mark Bullingham tha se procesi për të emëruar pasardhësin e Southgate ka filluar dhe "ne synojmë që menaxheri ynë i ri të konfirmohet sa më shpejt të jetë e mundur".
Ai shtoi se FA "ka një zgjidhje të përkohshme nëse është e nevojshme" dhe nuk do të komentojë më tej mbi procesin derisa të emërohet një shef i ri.
Ndeshja e radhës e Anglisë është kundër Republikës së Irlandës në Ligën e Kombeve më 7 shtator.
Southgate është i vetmi trajner që prej Kupës së Botës 1966, që drejton ekipin e Anglisë në një finale të turneve të mëdhenj.
Ai drejtoi Anglinë në katër turne të mëdhenj, duke arritur gjithashtu gjysmëfinalet e Kupës së Botës në 2018 dhe çerekfinalet në 2022.
Në turnetë kryesore midis 1966 dhe vitit 2016, Anglia fitoi gjithsej gjashtë ndeshje me eliminim direkt. Nën Southgate, Anglia fitoi nëntë ndeshje të tilla, duke përfshirë dy fitore nga penalltitë.
Presioni u rrit mbi të këtë verë, me shumë tifozë që besonin se ai nuk po merrte mjaftueshëm nga një grup i talentuar lojtarësh sulmues.
Disa tifozë i hodhën gota plastike pas barazimit 0:0 me Slloveninë në ndeshjen e fundit të fazës së grupeve në Euro 2024.
Southgate, i cili zëvendësoi Sam Allardyce pas periudhës së tij jetëshkurtër, fitoi 61 nga 102 ndeshjet e tij në krye të Anglisë, duke barazuar 24 dhe duke humbur 17.
Ish-mbrojtësi, i cili bëri 57 paraqitje për Anglinë midis 1995 dhe 2004, ka qenë i përfshirë në Kombëtarean e Anglisë që nga viti 2013, duke menaxhuar ekipin U-21 për tre vjet përpara se të merrte postin e Kombëtares A.
Përvoja e tij e vetme në menaxhimin e klubit ishte në Middlesbrough nga 2006-2009.
Southgate falënderoi lojtarët dhe stafin e tij, duke e quajtur ndihmësin Steve Holland "një nga trajnerët më të talentuar të brezit të tij".
