Ish-ylli i Ajaxit e Holandës do të ndiqet penalisht nën dyshimet se bëri kontrabandë 1370 kilogram kokainë
Ish-sulmuesi i Ajaxit dhe Kombëtares së Holandës, Quincy Promes, do të ndiqet penalisht, pasi dyshohet se është i përfshirë në kontrabandë prej 1370 kilogram kokainë.
Shërbimi i Prokurorisë Publike ka konfirmuar se Promes akuzohet se ka sjellë 1370 kg drogë në dy grupe, të cilat u kapën në Antwerp në vitin 2020.
Një seancë paraprake është planifikuar të zhvillohet në Holandë të hënën, më 5 qershor, sipas gazetës holandeze, NOS.
Promes, i cili aktualisht luan në Rusi me Spartak Moskën, po përballet gjithashtu me një akuzë për sulm të rëndë pasi dolën prova të reja në lidhje me një incident me thikë.
31-vjeçari dyshohet se ka goditur me thikë në gju kushëririn e tij në një ngjarje familjare. Promes i ka mohuar më parë akuzat, por është dëgjuar duke rrëfyer therjen me thikë në një përgjim të policisë. Pjesa e fundit e këtij rasti do të shqyrtohet të hënën e ardhshme.
Prokurorët holandezë kanë kërkuar më parë burgosjen e Promes për incidentin, siç raporton France 24.
“Prokuroria ka kërkuar dy vjet burg për një person që dyshohet se ka goditur me thikë në gju kushëririn e tij”, thanë prokurorët në një deklaratë.
Promes është në periudhën e tij të dytë me Spartak Moskën dhe ka luajtur gjithashtu për FC Twente, Sevilla dhe Ajax gjatë karrierës së tij, si dhe ka grumbulluar 50 paraqitje ndërkombëtare për ekipin kombëtar të Holandës.
