Guardiola bën shaka: Presidenti im nuk do të më shkarkojë nesër

Pep Guardiola ka bërë shaka se fitorja e Manchester Cityt në raundin e katërt të FA Kupës kundër Leyton Orient i shpëtoi punën.

City ishte pranë një prej surprizave më të mëdha në historinë e kompeticionit, pasi skuadra e Ligës së Parë, Orient, kaloi në epërsi pas një autogoli nga Stefan Ortega. Një goditje e mahnitshme nga Jamie Donley nga 45 metra përfundoi duke goditur traversën dhe më pas shpinën e portierit të Cityt.

Golat në pjesën e dytë nga Abdukodir Khusanov dhe Kevin De Bruyne siguruan një fitore 2:1, duke shmangur eliminimin dhe duke qetësuar Guardiolën. Ndërkohë, tifozët e entuziazmuar të Orientit në stadiumin Gaughan Group i drejtonin thirrje trajnerit të Cityt për të ardhmen e tij.

I pyetur mbi atmosferën në stadium, Guardiola u përgjigj me humor:

“Kur dëgjon ‘do të shkarkohesh në mëngjes’, nuk është shumë e këndshme. Por është bërë një rutinë në të gjitha stadiumet. Gjithsesi, me këtë rezultat, besoj se presidenti im nuk do të më shkarkojë nesër.”

Duke folur për përvojën në stadiume më të vogla, ai shtoi:

"Ishte një përvojë e bukur. Nuk e di nëse në 'Ligën e Parë' çdo ndeshje ka një atmosferë të tillë, por ishte vërtet e mirë. Këtu vjen për të shijuar futbollin. Dhoma e zhveshjes ishte shumë e vogël, lojtarët mund të komunikonin më shumë se në një dhomë zhveshjeje të zakonshme. Por unë u thashë atyre shumë herë: ‘Ne kemi ardhur nga këtu’. Nuk jemi rritur duke luajtur drejtpërdrejt në Wembley. Të gjithë kemi kaluar nga dhomat e vogla të zhveshjes dhe nga ligat e ulëta. Më pëlqen mënyra se si skuadra u përball me këtë sfidë, sepse Kupa FA ka parë shumë surpriza gjatë historisë së saj të gjatë.”

Manchester City tani përgatitet për përballjen ndaj Real Madridit në fazën e parë të play-offit të Ligës së Kampionëve. Ndërkohë, në Premierligë, ata ndodhen 15 pikë pas kreut, duke e bërë pozicionin e tyre edhe më të vështirë.

“Tani situata jonë është disi e paqëndrueshme emocionalisht. Kemi shumë lëndime, prandaj kjo fitore më bën kaq krenar dhe kaq të lumtur,” tha Guardiola.

Në këtë ndeshje, City debutoi dy nga afrimet e janarit, Nicolas Gonzalez dhe Vitor Reis. Gonzalez u detyrua të largohej pas 22 minutash për shkak të një dëmtimi, për të cilin Guardiola më pas pranoi se nuk ishte i sigurt për ashpërsinë e tij, ndërsa Reis u zëvendësua për arsye taktike në pjesën e parë.