Ronaldo i vë ultimatum Manchester Unitedit, Bayerni e do për ta zëvendësuar Lewandowskin

Cristiano Ronaldo po mendon të largohet nga Manchester Unitedi për shkak të dështimit të klubit për ta forcuar skuadrën deri tani këtë verë, sipas mediave në Portugali.

Superylli portugez u kthye në Old Trafford verën e kaluar, 13 vjet pasi ishte larguar për t’iu bashkuar Real Madridit për një shumë rekorde botërore atë kohë, por kthimi i tij në shtëpi nuk doli të ishte i lavdishëm siç kishte shpresuar ai.

Ronaldo i shënoi 24 gola në 38 ndeshje në të gjitha garat por Unitedi nuk arriti më shumë se vendin e gjashtë në Premierligë dhe portugezi u kritikua për ndikim të keq në aftësitë e skuadrës për të bërë presing të lartë dhe në lojën ekipore.

37-vjeçari e ka edhe një vit të mbetur në marrëveshjen me djajtë e kuq dhe e ardhmja e tij tani është shumë e pasigurt.

Megjithëse është interesuar për Darwin Nunez, i cili iu bashkua Liverpoolit në fund, dhe për mesfushorin e Barcelonës Frenkie de Jong dhe anësorin e Ajaxit Antony, Unitedi nuk ka nënshkruar me asnjë lojtar deri tani këtë verë.

Dhe sipas mediave në Portugali, Ronaldo është i zemëruar me këtë dhe i gatshëm për t’u larguar nga Unitedi.

Raportohet se ish-ylli i Sportingut dhe Juventusit i ka vendosur ultimatum klubit duke thënë: “përforcojeni skuadrën ose unë largohem”.

Besohet se Ronaldo e ka informuar rrethin e ngushtë se nëse Unitedi nuk e përforcon skuadrën, ai do të largohet këtë verë.

Ndërkohë, raportohet se Bayern Munich e sheh portugezin si zëvendësuesin e duhur të Robert Lewandowskit, sulmuesit polak që ka vendosur të largohet nga kampioni gjerman për t’iu bashkuar Barcelonës.

Bayerni nuk dëshiron ta lëshojë polakun të largohet pa e gjetur një zëvendësues të mirëfilltë për të, pavarësisht se sapo e ka blerë Sadio Manen nga Liverpooli.

Besohet se përfaqësuesit e Ronaldos janë në dijeni për interesimin e Bayernit për portugezin dhe janë të gatshëm t’i nisin bisedimet me gjigantin gjerman.