“Themelorja bën, Supremja s’bën”, qysh ra në paradoks Vetëvendosja, duke ia besuar interpretimet ligjore Hekuran Muratit

Gjykata Supreme me një Aktgjykim mbi një rregullore të nxjerur nga ministri/deputet Hekuran Murati, qartësoi se në Republikën e Kosovës, për shkak të Kushtetutës, ligjeve pozitive dhe krejt arkitekturën ligjore, nuk mund të jesh edhe deputet edhe ministër. Nuk mund të ushtrosh edhe pozitë ekzekutive e edhe legjislative në të njejtën kohë. Kur doli ky Aktgjykim, Vetëvendosja (kushedi nga kush të këshilluar), thanë se nuk i takon Gjykatës Supreme të interpretoj Kushtetutën. Ky argument i Vetëvendosjes është tentim për lajthitje. Qe pse:

Është e vërtetë se interpretimin e Kushtetutës e bënë Gjykata Kushtetuese. Ajo aktivizohet kur subjektet që kanë të drejt të dërgojnë lëndë aty, e bëjnë një gjë të tillë. Por, por, por... krejt gjykatat e Republikës, ligj mbi secilin ligj e kanë Kushtetutën e Kosovës. Sepse ajo është burimi i të gjitha ligjeve e akteve nënligjore. Pra, krejt rregullimit juridik.

Po ua sjellim veç një rast, më i freskëti, kur njëra nga gjykatat e rregullta; ajo Themelore nxorri një Aktgjykim, sigurisht ndër të tjera duke u nisur nga burimi i krejt ligjeve, Kushtetuta. Dhe se si ky Aktgjykim u mirëprit nga Lëvizja Vetëvendosje, sepse u pëlqeu.

Vidovdani – Kushtetuta

• Komuna e Graçanicës ka bërë tejkalim të kompetencave të veta ligjore dhe cënuar rëndë karakterin unitar dhe kushtetues të shtetit të Kosovës.

Kështu ka konstatuar Gjykata Themelore e Prishtinës për një vendim kontraverz të Komunës së Graçanicës për festën serbe të “Vidovdanit” të cilën e festojnë më 28 qershor për të shënuar “Betejën e Kosovës” së 1389’ës si një folklor-mitologji serbe.

Çështja e një vendimi të Komunë së Graçanicës për vendosje së flamujve serbë në hapësira publike – pa qenë “Vidovdani” festë zyrtare në Republikën e Kosovës – si të një feste “me ndikim të veçantë publik (për komunitetin serb)” ka bërë ekzekutivi kosovar ta konstestojë atë në gjykatë: përkatësisht Ministria e Pushtetit Lokal (MAPL).

Gjykata Themelore në Prishtinë miratoi padinë e MAPL-së dhe anuloi vendimin e Komunës së Graçanicës, për një sërë arsyesh. Më kryesorja… qëllone? Kushtetua.

“ Me vendimin e të paditurës është cënuar rëndë karakteri unitar dhe kushtetues të Republikës së Kosovës. Sipas nenit 1 të Kushtetutës së Republikës së Kosovës, Kosova është një shtet unik dhe i pandashëm, dhe autoritetet komunale nuk mund të ndërmarrin veprime që e relativizojnë këtë parim. Lejimi i flamurit të një shteti tjetër (serbisë), jashtë rasteve të parapara me ligj, mund të perceptohet si akt simbolik i sovranitetit të dyfishtë apo vetëorganizimit politik në kundërshtim me rendin kushtetues.” – thuhet në aktgjykimin e Gjykatës Themelore.

“Kjo është veçanërisht e rëndësishme në kontekstin e ndjeshmërisë etnike dhe politike në Kosovë. Çdo lejim i tillë pa bazë ligjore mund të krijojë precedent të rrezikshëm për minimin e rendit juridik dhe unitetit shtetëror”, shkruhej në vendimin e Gjykatës.

Ky aktgjykim u publikua para një muaji. Sigurisht, eksponent të Vetëvendosjes e duarëtrokitën. Pra, bazuar në kushtetutë dhe ligje u nxorr aktgjykimi. Sepse, kur e do rendi dhe vendi, ashtu nxirren. Kjo është forma.

Por, kur Gjykata Supreme nxorri Aktgjykim për një akt nënligjor të prodhuar nga ministri/deputet Hekuran Murati, akt ky i kontestuar nga subjektet që prekeshin direkt nga akti. Supremja, pra Gjykata e rregullt, por më e larta, në krejt arsyetimin e saj, që shpalli të pavlefshëm aktin, solli edhe Kushtetutën, e cila e përcakton ndarjen e pushteteve. Në fakt nga aty, nga ai nen, burojnë ligjet, si ai për qeverinë, i cili poashtu u elaborua në Aktgjykim. Por, Vetëvendosja me kryeinterpretuesin e normave juridike, ekonomistin Hekuran Murati, ngatërroi gjithçka, duke aluduar se Gjykata Supreme, s’ka çka kërkon në Kushtetuë.

Qesharake, por po; kështu ndodhi.