Reagon KFOR: Dënojmë ashpër sulmin në Zubin Potok, autorët të mbahen përgjegjës
KFOR ka dënuar ashpër sulmin e mbrëmshëm në kanalin e Ibër-Lepencit, duke thënë se është e rëndësishme që faktet të vërtetohen.
KFOR tutje ka thënë se ata që e kanë kryer sulmin duhet të mbahen përgjegjës.
“Misioni i NATO-s, KFOR, dënon ashpër sulmin në tubacionin e ujit të Zubin Potokut, i cili pati një ndikim të rëndë në furnizimin me ujë dhe energji elektrike në veri të Kosovës. Është e rëndësishme që të vërtetohen faktet dhe që autorët të mbahen përgjegjës dhe të sillen para drejtësisë.” - ka thënë KFOR.
Nga KFOR tutje janë shprehur se kanë ofruar siguri në vend dhe zonat përreth dhe se ka ndihmuar edhe në asgjësimin logjistik të mjeteve shpërthyese dhe mbështetje për institucionet e Kosovës.
“Personeli i KFOR-it që nga mbrëmë ka ofruar siguri në tubacionin e ujit dhe në zonat përreth; për më tepër, KFOR-i ka ofruar të sigurojë asgjësimin logjistik të mjeteve shpërthyese dhe mbështetje inxhinierike për institucionet në Kosovë”.
Ndërkohë, KFOR-i përsërit se vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme.
“KFOR-i punon në koordinim të ngushtë me Policinë e Kosovës dhe EULEX-in (Misioni i Bashkimit Europian për Sundimin e Ligjit në Kosovë), në rolet e tyre përkatëse si reagues të sigurisë”.
