Qeveria bën 'fushatë' për opozitën në Maqedoni: E godet Bujar Osmanin për planin e OSBE-së në veri
Pjesëmarrja e Vetëvendosjes në zgjedhjet e Maqedonisë së Veriut, po del se nuk është veç një vendim i një partie politike në Kosovë.
Tashmë duket që VV-ja, parti që ka pushtetin në Kosovë, po e shfrytëzon pushtetin për t’u pozicionuar politikisht kundër disa partive në Maqedoninë e Veriut. Më saktë kundër BDI-së dhe Ali Ahmetit.
Por, si po e bën këtë?
Tashmë edhe aparati shtetëror është funksionalizuar. Zëdhënësi i Qeverisë së Kosovës, Përparim Kryeziu, në cilësinë e zëdhënësit, ka goditur direkt kandidatin për president nga BDI-ja, Bujar Osmanin.
Mbase, nuk është e rastësishme sepse pak ditë më parë kryeministri Kurti e priti rivalin e Osmanit, Arben Taravarin në takim.
Megjithatë, goditja kësaj radhe është tentuar të duket më diplomatike. Përparim Kryeziu e ka përmendur planin e OSBE-së rreth situatës në veri muaj më parë, në kohën kur Osmani e udhëhiqte presidencën e OSBE-së. Një plan që dihej kohë më parë se ishte realizuar nga Bujar Osmani.
“Në planin 9 pikësh të OSBE-së, Kosovës i kërkohet të tërheqë Policinë Speciale nga veriu i Kosovës, teksa Serbisë vetëm të ulë gatishmërinë e Ushtrisë (Pika 2). Pra, Kosovës të largojë forcat që rezultuan që garantojnë sigurinë, sundimin e ligjit dhe integritetin territorial të vendit, kurse Serbisë të ulë gatishmërinë e forcave që kërcënojnë me agresion sigurinë dhe integritetin territorial të Kosovës”, e nis postimin zëdhënësi Kryeziu.
“Po ashtu, pika 3 e po atij plani, sygjeron që për sigurinë në terren, përgjegjëse të bëhet policia e rregullt, me asistencën e KFOR-it dhe EULEX. Gati katër muaj më pas, me 24 shtator, një patrollë e policisë së rregullt u sulmua nga trupa paramilitare, me armatim të sofistikuar, të financuar e mbështetur nga shteti i Serbisë. Aty mbeti i vrarë rreshteri i Policisë së Kosovës, Heroi, Afrim Bunjaku. Rendin dhe sigurinë në terren brenda ditës e riktheu Policia Speciale e Kosovës. Po mos të ishte kjo njësi në veri, sot do të njihnim një realitet tjetër pas sulmit terrorist dhe paramilitar të 24 shtatorit në Banjskë”, thekson ai.
“Plani gjithashtu i kërkon Kosovës që kryetarët e katër komunave në veri të japin dorëheqje në verën e vitit të kaluar (Pika 5). Ashtu siç kërkonte me ngulm edhe Serbia, e cila shpresonte që në këtë mënyrë të zhbënte shpejt gabimin e saj me rastin e thirrjeve për serbët e Kosovës që të braktisin institucionet e Kosovës dhe të bojkotojnë zgjedhjet në katër komunat në veri”, thuhet në postim.
Zëdhënësi i Qeverisë vendos ta luajë të ‘painformuarin’, duke thënë se tek dje e kanë marrë vesh që ky plan është hartuar nga vet Bujar Osmani. Madje, Kryeziu shkon aq larg sa thotë se Bujar Osmani e sheh Kosovën me sytë e ndërmjetësve ndërkombëtarë.
Një postim që nuk duket rastësi duke ditur përfshirjen kokë e këmbë të VV-së në zgjedhje, me këshilltarin e Kurtit atje, Bekim Qokun.
“Dje e kuptuam që plani 9 pikësh i OSBE-së, qenka hartuar nga vetë z. Bujar Osmani. Një rast tjetër kur shqiptarët e shohin Kosovën me sytë e ndërmjetësve ndërkombëtarë. Në fund, ky plan, nuk u bë plan i qeverisë. Deeskalimi ndodhi. Pa e dëmtuar sovranitetin e pa rrezikuar sigurinë. Në katër komunat në veri ka më shumë normalitet se kurdoherë tjetër. Sa herë që ka patur tensione, ato janë shkaktuar nga struktura e organizime kriminale. Dorëheqje të kryetarëve nuk ka. Ka trasim të një procesi ligjor e demokratik drejt zgjedhjeve të reja në këto komuna që respekton edhe kushtetutshmërinë e legjislacionin, por edhe vullnetin e qytetarëve. E kur të mbahen, ato do të jenë të lira e demokratike. Nuk kanë qenë gjithmonë ashtu”, ka shkruar Përparim Kryeziu.
Ky reagim vjen pas një interviste që bëri dje Bujar Osmani në Kallxo.com. Pra, duket se zëdhënësi nuk e ka zbuluar 'ujin e nxehtë'
Kandidati për president i Maqedonisë së Veriut, Bujar Osmani ka treguar se çfarë ka bërë për Kosovën gjatë kohës sa ka qenë kryesues i OSBE-së.
“Fillimisht kam qenë në vizitë në Prishtinë. Përveç takimit me presidenten, kryeministrin , ministren e jashtme, me kryeministrin vizituam edhe Akademinë për policë, ku i përshëndetem policët e rinj përfshirë edhe ata të komuniteteve. Për së dyti pastaj dola me planin 9 pikësh për deeskalim në veri të Kosovës, si kryesues i OSBE-së për shkak se me vendim të OSBE-së është vështirë të merren vendime për shkak se janë me konsensus atje dhe prandaj shfrytëzova mandatin tim si kryesues që të dal me planin 9 pikësh i cili pastaj u bë edhe plan i Qeverisë së Kosovës për deeskalim, përfshirë këtu shpalljen e zgjedhjeve dhe normalizimin e situatës atje”, ka thënë Bujar Osmani.
