Osmani i thotë Bashës se "do të veprojë në përputhje të plotë me Kushtetutën dhe ligjet në fuqi"
Presidenca ka njoftuar për takimin mes Presidentes Vjosa Osmani dhe kryetarit të Kuvendit, Dimal Basha, ku Osmani e informoi atë se “ekipi ligjor i Presidencës është duke shqyrtuar procesin e konstituimit të Kuvendit të Kosovës.”
Osmani, siç thuhet në njoftim, ka theksuar se “do të veprojë në përputhje të plotë me Kushtetutën dhe ligjet në fuqi.”
Njoftimi:
Presidentja Osmani priti në takim kryetarin e Kuvendit, z. Dimal Basha
Presidentja e Republikës së Kosovës, Vjosa Osmani, ka pritur sot në takim, në cilësinë e tij, të kryetarit të sapozgjedhur të Kuvendit të Kosovës, z. Dimal Basha.
Në këtë takim, Kryetari Basha e ka prezantuar qëndrimin e tij lidhur me konstituimin e Kuvendit të Republikës së Kosovës. Në anën tjetër, Presidentja Osmani e ka informuar kryetarin Basha se ekipi ligjor i Presidencës është duke bërë analizën lidhur me procesin e konstituimit të Kuvendit të Kosovës.
Presidentja ka potencuar se, sikurse gjithmonë, do të veprojë në përputhje të plotë me Kushtetutën dhe ligjet në fuqi, duke garantuar stabilitetin institucional dhe respektimin e vullnetit të qytetarëve të Kosovës.
