Mbajtja e zgjedhjeve jashtë përfaqësive diplomatike: KQZ në shkelje të rëndë të ligjit, organizon votim në restorante dhe ambiente religjioze

1 muaj më parë

nga Muhamet Koci

Komisioni Qendror i Zgjedhjeve dje ka miratuar kërkesën e Ministrisë së Punëve të Jashtme dhe Diasporës për të hapur qendra shtesë të votimit jashtë përfaqësive diplomatike të Republikës së Kosovës.

Një veprim i tillë është në kundërshtim me Ligjin për Zgjedhjet e Përgjithshme dhe praktiken e deritashme zgjedhore.

Ajo që e bën edhe më shqetësues vendimin është fakti se shumica e këtyre qendrave do të vendosen në ambiente private, përfshirë restorante, lokale dhe hapësira të tjera, të cilat nuk janë të përshtatshme dhe larg standardeve shtetërore.

Pasi KQZ-ja ka publikuar adresat, gazeta Nacionale ka hulumtuar dhe ka siguruar pamje të vendeve ku do të organizohen këto zgjedhje.

Nacionale ka raportuar edhe dje se vendimi i KQZ-së për të organizuar votime jashtë ambasadave dhe konsullatave është jashtë çdo praktike të njohur zgjedhore dhe bie ndesh me ligjin për zgjedhjet e përgjithshme dhe rregulloren zgjedhore të KQZ-së për organizimin e votimit jashtë Kosovës.

Madje, ky vendim i KQZ-së bie ndesh ligjin për Zgjedhjet e Përgjithshme dhe rregulloren zgjedhore të KQZ-së për organizimin e votimit jashtë Kosovës.

Sipas nenit 96, paragrafi 8, KQZ kërkon nga MPJ, listën e të gjitha përfaqësive diplomatike, bashkë me detajet e nevojshme mbi hapësirën e objekteve dhe t’i përshtat hapësirat e objekteve të përfaqësive diplomatike në vendvotime sipas kritereve të përcaktuara nga KQZ.

“KQZ kërkon nga MPJ, listën e të gjitha përfaqësive diplomatike, bashkë me detajet e nevojshme mbi hapësirën e objekteve. Ministria e Punëve të Jashtme obligohet që t’i ofrojë KQZ-së të gjitha informacionet e kërkuara brenda tre (3) ditë, nga dita e pranimit të kërkesës. MPJ përshtat hapësirat e objekteve të përfaqësive diplomatike në vendvotime sipas kritereve të përcaktuara nga KQZ”, thuhet në ligj.

Në mbështetje të propozimeve të Ministrisë së Jashtme që udhëhiqet nga Donika Gërvalla, e cila është në koalicion me partinë e Albin Kurtit, Lëvizjen Vetëvendosje, janë deklaruar përfaqësuesit e këtij subjekti politike, Alban Krasniqi dhe Sami Kurteshi. Por, kalimi i vendimit u bë i mundur me votën e kryetarit të KQZ-së, Kreshnik Radoniqit dhe tre anëtarëve nga radhët e komuniteteve.

Sipas vendimit të miratuar me 6 vota për dhe 5 kundër, KQZ do të hapë 10 qendra votimi shtesë, ashtu siç ka propozuar Ministria e Jashtme.

Sipas KQZ-së, 5 qendra do të hapen në Gjermani, 3 në Zvicër dhe nga 1 në SHBA dhe Mbretërinë e Bashkuar. 45 vendvotime do të hapen në këto qendra dhe për të votuar mund të regjistrohen 40,850 votues.