Vlera e koeficientit 105 euro, kryesindikalisti i Policisë: Na kanë shtri përtoke
Sot në mbledhjen e Qeverisë së Kosovës, është përcaktuar vlera e koefiecientit.
Kryeministri i Kosovës, Albin Kurit ka konfirmuar se vlera e koeficientit për pagat e zyrtarëve publikë për vitin 2023 do të jetë 105, ndërsa nga janari i vitit 2024, do të jetë 110.
Gazeta Nacionale ka kontaktuar edhe Kryetarin e Sindikatës së Policisë së Kosovës, Imer Zeqirin për të pyetur për këtë çështje.
Ai ka thënë se me këtë përcaktim të kësaj vlere të koeficientit, i kanë shtrirë për tokë Policinë e Kosovës.
“Mos na thirrni hiç më mirë, na kanë shtre për toke. Unë prej mjeteve të informimit e mora vesh”, është shprehur Zeqiri që në fjalët e para të telefonatës.
Ai ka thënë se përcaktimi i vlerës së koeficientit prej 105 eurosh është i papranueshëm për Policinë e Kosovës.
“Përcaktimi i vlerës së koeficientit për Policinë e Kosovës është e papranueshme, edhe jo vetëm që ka me pas ankesa, unë e di që ka shumë pakënaqësi në tërë sektorin publik, por sidomos tek ne është jashtëzakonisht e papranueshme. Me këtë vlerë të koeficientit dhe me pjesën tjetër të ligjit që i kanë zbrit shtesat e tjera me ligj të pagave, nuk ka rritje të pagave, përkundrazi tek një pjesë e policisë ka zbritje, prandaj kjo është ajo që jo që është e papranueshme por këtu sigurtë dikush po don me e shkatërru këtë vend”, ka thënë tutje ai.
Zeqiri, gjithashtu tha se do të konsultohet edhe më Këshillin Drejtues edhe me sindikatat e tjera për këtë çështje, për të cilën tha se mëndon se në tërë sektorin publik ka pakenaqësi.
“Më duhet me u taku me këshillin drejtues me vendos edhe në bashkëpunim me sindikatat e tjera. Sigurisht që do të jemi të gjithë të njëjti mendim, dhe do të veprojmë se bashku”, ka thënë Zeqiri.
Sipas llogaritjeve, policët e Kosovës do të paguhen 525 euro.
Kujtojmë se Kurti në mbledhjen e sotme të Qeverisë së Kosovës, ka bërë të ditur se nga Ligji i ri për Paga, do të prekën rreth 82 mijë zyrtarë publikë.
“Në janar të vitit 2024, sipas përllogaritjeve të ministrisë së Financave, punës dhe transfereve, ai do të jetë 110.” – tha ai në mbledhjen e sotme të Qeverisë.
Sipas kryeministrit me këtë sistem të ri, është dhënë mbështetje solide për kategoritë si mjekët, arsimtarët, policët dhe ushtarakët.
Ndryshimi i Ligjit është miratuar pro, pa marrë asnjë votë kundër dhe asnjë abstenim.
