Kërcënimi nga Irani: Si u largua Trump fshehurazi nga Turqia, “Air Force One” u përdor si mashtrim

Presidenti i ShBA-së, Donald Trump, ka bërë një veprim të pazakont gjatë qendrimit në Truqi gjatë kohës kur po mbahej Samitit i NATO-s, pasi që kishte marrë një kërcenim nga Irani.

Donald Trump nuk u largua nga Turqia me avionin presidencial “Air Force One”, siç u bë e ditur publikisht. Për shkak të një kërcënimi iranian ndaj presidentit amerikan, u zhvillua një operacion i fshehtë sigurie, ku avioni presidencial u përdor si “karrem”, ndërsa Trump u transportua me një avion tjetër ushtarak.

Presidenti amerikan Donald Trump u largua fshehurazi nga Turqia më 8 korrik, në një operacion të pazakontë sigurie të ndërmarrë pas një kërcënimi iranian ndaj tij, raporton The Washington Post.

Sipas dokumenteve dhe materialeve të siguruara nga gazeta, Trump u largua nga Turqia me një avion ushtarak më të vogël të tipit C-32A, ndërsa Shtëpia e Bardhë publikisht la të kuptohej se ai ndodhej në avionin presidencial “Air Force One”.

Operacioni u zhvillua pas një kërcënimi të konsideruar të besueshëm nga Irani, në një kohë kur SHBA-ja dhe Irani ndodheshin në konflikt dhe forcat amerikane kishin rifilluar sulmet ndaj objektivave iraniane.

Trump hipi në “Air Force One”, por doli fshehurazi

Në Ankara, Trump u pa nga kamerat duke hipur në avionin e vjetër presidencial Boeing 747, i njohur si “Air Force One”. Por, vetëm disa minuta më vonë, ai u largua fshehurazi nga avioni.

Sipas burimeve të cituara nga The Washington Post, Trump dhe disa bashkëpunëtorë të tij u futën në një kamion që përdoret zakonisht për furnizimin e avionëve me ushqime dhe pajisje.

Kamioni u ngrit me sistem hidraulik deri te dera e avionit dhe Trump u transferua në të, pa u vënë re nga gazetarët dhe personeli që ndodheshin në aeroport.

Më pas, kamioni u zhvendos drejt një avioni tjetër, një C-32A, ku Trump u ngjit dhe prej aty vazhdoi fluturimin drejt Britanisë.

Në të njëjtën kohë, gazetarët e Shtëpisë së Bardhë dhe një pjesë e stafit presidencial vazhduan të besonin se presidenti ndodhej në avionin presidencial.

“Air Force One” u përdor si avion mashtrues

Avioni presidencial shërbeu kështu si një “decoy”, ose avion mashtrues, për të fshehur vendndodhjen reale të presidentit.

Në avionin 747 ndodheshin gazetarë dhe pjesëtarë të stafit të Shtëpisë së Bardhë, ndërsa Trump po udhëtonte në avionin tjetër.

Gazetarëve iu kërkua gjithashtu t’i mbyllnin perdet e dritareve gjatë largimit nga Turqia.

C-32A, avioni ku ndodhej Trump, përdori një thirrje të zakonshme ushtarake, “Reach 18”, në vend të thirrjes që zakonisht lidhet me avionin presidencial.

Sipas të dhënave të analizuara nga gazeta, gjurmimi i avionit C-32A nuk ishte i disponueshëm, ndërsa avioni “Air Force One” vazhdoi të shfaqej në radar dhe gjatë fluturimit mori edhe shenjën “AF1”, edhe pse Trump nuk ndodhej në të.

Pse u ndërmor operacioni?

Sipas një zyrtari amerikan të cituar nga gazeta, një kërcënim i besueshëm ndaj Trumpit, i lidhur me Iranin, ishte arsyeja që aktivizoi këtë operacion mashtrimi.

Shërbimet amerikane kishin paralajmëruar për një kërcënim specifik ndaj presidentit ose avionit të tij.

Rreziku ishte veçanërisht i ndjeshëm pasi Trump ndodhej në Turqi, shtet anëtar i NATO-s që ndan kufi me Iranin.

Për më tepër, Trump kishte udhëtuar drejt Turqisë me avionin e ri Boeing 747-8, të dhuruar nga Katari për përdorim presidencial.

Ky avion ishte bërë objekt debati për shkak të kapaciteteve të tij mbrojtëse, të cilat, sipas raportimeve të mëparshme, nuk ishin në të njëjtin nivel me masat kundër kërcënimeve të avionëve tradicionalë presidencialë amerikanë.

Shtëpia e Bardhë ka mohuar se avioni i ri paraqet rrezik për presidentin dhe ka deklaruar se ai është i pajisur me teknologjitë e nevojshme për misionin presidencial.

Trump më vonë u shfaq në “Air Force One”

Pas mbërritjes në bazën ajrore Mildenhall në Britani, Trump u shfaq para kamerave duke zbritur nga avioni i vjetër presidencial.

Nuk është e qartë se si u transferua nga C-32A në “Air Force One” pas mbërritjes.

Më pas, Trump vazhdoi udhëtimin drejt Shteteve të Bashkuara me avionin e ri presidencial të dhuruar nga Katari.