Hamza i ashpër me Kurtin: Tallje me qytetarët të thuash se ke vota për qeveri, por jo për Kuvend
“Nëse nuk iu duhet ndihma dhe vota jonë fare të mos na pyesin.”
Kështu iu përgjigj kryetari i Komunës së Mitrovicës së Jugut dhe kandidati për kryeministër nga PDK në zgjedhjet e 9 shkurtit, Bedri Hamza, akuzave të Vetëvendosjes në dritën e ngërçit politik që ka paralizuar formimin e institucioneve të Kosovës.
Hamza e fajësoi drejtpërdrejt Vetëvendosjen dhe partitë në koalicion me të për dështimin e 29-të me radhë në përpjekjen për të zgjedhur kryetarin e Kuvendit, duke e cilësuar këtë si mungesë të vullnetit për marrëveshje.
Ai paralajmëroi për pasoja serioze nëse nuk formohen institucionet shpejt, sidomos në lidhje me afatin për miratimin e buxhetit deri më 31 tetor.
“Ne e dimë që më 31 tetor është dita e fundit kur buxheti i Kosovës duhet me u procedu dhe me u aprovu në Qeveri dhe me u aprovu në Kuvend. Paramendojeni këtë situatë dhe vendi të futet në vitin e ardhshëm pa buxhet të aprovuar [...] qysh i ekzekuton pagat, qysh i paguan pensionet, qysh i paguan obligimet?” – deklaroi Hamza.
“Këtu po shihet që partia, me partnerët e koalicionit, qëllimisht nuk është tu dashtë me e zhblloku situatën. Asnjëherë në të kaluarën nuk ka pasur rast kur kryetari i Kuvendit është zgjedhur pa marrëveshje politike. PDK-ja është shumë gjeneroze. Nuk po i thotë një, nuk po jep emra, pa kurrfarë kushti, pa kurrfarë kërkese, po thotë: 40 të tjerë, në përjashtim të atyre që kanë qenë pjesë e qeverisë, cilindo propozoje, unë ta votoj.”– tha ai.
Ai shtoi se PDK-ja është e gatshme të ndihmojë pa vendosur asnjë kusht, por se bllokada nuk po vjen nga mungesa e mbështetjes opozitare, por nga vetë shumica.
“Nëse nuk të duhet ndihma dhe vota jonë, fare të mos na pyesin. Nëse i duhen numrat dhe përkrahja prej PDK-së, ne nuk po kufizohemi në një, dy apo tre. Nuk po japim emra sepse është në të drejtën e tyre. Por, prej 40 vetëve, nuk po e gjejnë një me propozu.”
Hamza e quajti “tallje me qytetarët” pretendimin e Kurtit se ka vota për formimin e qeverisë, por jo për kryeparlamentarin.
“Partia e parë e ka të drejtën, por e drejta vjen edhe me përgjegjësi. Nëse ke të drejtë ti me propozu kandidatin/en, atëherë ke edhe përgjegjësi me ia bë votat. Është absurd kjo lojë e fjalëve dhe është shumë e ulët. Me thënë ‘i kemi votat për qeveri, por s’i kemi votat për kryetar të Kuvendit’. Është tallje. Nëse i ke votat për qeveri, cila është arsyeja që ata s’po ua japin votat për kryetar të Kuvendit? Kurrfarë arsyetimi për këtë nuk ka. Prandaj, VV, me partnerët e koalicionit, është përgjegjëse për vonesën katërmujore të moskrijimit të institucioneve të Kosovës.”– shtoi ai.
