Petrit Halilaj dhe Álvaro Urbano prezantojnë "Ansamblin Hënor për Dete të Rrëmbyera" në Venecia

Artistët Petrit Halilaj & Álvaro Urbano kanë prezantuar instalacionin e ri të titulluar Ansambli Hënor për Dete të Rrëmbyera (Lunar Ensemble for Uprising Seas) në Ocean Space në Venecia të Italisë, brenda kishës historike të San Lorenzos. Instalacioni është pjesë e ekspozitës Kështu Dallgët në Dyshe Vijnë, kuruar nga Barbara Casavecchia, kritike dhe kuratore e pavarur që vepron në Milano.

Në ekspozitën e hapur prej datës 22 prill deri me 5 nëntor 2023, artistët kanë krijuar një ekosistem evolues të mbushur me skulptura që reprezentojnë krijesa imagjinare.

Titulli i ekspozitës Kështu Dallgët në Dyshe Vijnë është marrë nga poezia Deti dhe Mjegulla (Sea and Fog) nga Etel Adnan dhe sjell takimin mes skulpturave monumentale të qeramikës dhe xhamit të artistes Simone Fattal dhe instalacionit të parë të dyshes së artistëve.

Ansambli Hënor për Dete të Rrëmbyera është komisionuar nga TBA21-Academy dhe Audemars Piguet Contemporary dhe vë në pah misionet paralele të dy progameve: mbështetjen e artistëve në hulumtim, prodhim artistik si dhe inkurajimin e dialogut dhe të të menduarit krijues për audiencën globale.

Me Ansamblin Hënor për Dete të Rrëmbyera artisti Petrit Halilaj i cili vepron në Berlin (l.1986) dhe Álvaro Urbano (l. 1983) kanë krijuar një ekosistem evolues që përfshin mbi 30 skulptura të mëdha të krijesave hibride ujore, tokësore dhe ajrore, të vendosura përfundi një hëne në formë veze, që duket se e ka materialin e njëjtë sikur muret e ish-kishës.

Instalacioni merr inspirimin prej një kënge të njohur në Spanjë, të titulluar Ay mi pescadito, ku peshqit e vegjël ndjekin mësimet në një shkollë në fund të detit për të mësuar për format e mbijetesës dhe përkatësisë. Artistët kanë krijuar një instalacion i cili eksploron kohezionin si dhe rezistencën apo mungesën e harmonisë mes specieve të ndryshme, si dhe mes organizmave të gjallë dhe objekteve.

Skulpturat variojnë për nga madhësia dhe format e tyre, ndërkaq asnjëra prej krijesave nuk është realistike për botën tonë. Të gjitha janë me një gjendje zhvillimi me tipare për të mbijetuar nën ujë, në tokë e në qiell poashtu.

Lëkurat metalike të skulpturave e reflektojnë dritën e diellit në muret, tavanet dhe dyshemetë e kishës, duke modifikuar perceptimin e hapësirës gjatë ditës.

Çdo skulpturë çiftëzohet si instrument muzikor duke prodhuar tinguj prej kutive të muzikës dhe teknikave të tjera, të cilat vijnë në jetë vetëm prej ndërveprimeve të njerëzve me këta tinguj.

Ata tentojnë bashkë drejt një “melodie” të inspiruar nga kënga Ay mi pescadito dhe zhurmave nën-ujore, të cilat nuk harmonizohen edhe aq lehtë. E vështirësia për ta arritur këtë melodi të përsosur e pasqyron vështirësinë e krijimit të sinkronisë së përsosur në botën materiale.

Sipër krijesave, në tavan, e varur qëndron një skulpturë e madhe në formë vezeje e cila duket sikur pluskon në hapësirë. Veza është e mbuluar me një material shkumësi që i ngjason mureve të ndërtesës.

Duke reflektuar mbetjet e hapësirës, materialiteti simbolizon ri-përdorimin dhe transformimin si pjesë e natyrës ciklike të botës tonë. Ngjall mundësitë dhe format alternative të ardhshme të jetës, transformimit dhe prindërimit, të cilat duhet riimagjinuar.

Përgjatë gjithë ekspozitës, një grup muzikantësh dhe interpretuesish aktivizojnë instalacionin në intervale dhe kohëzgjatje të ndryshme. Mes interpretimeve, Halilaj dhe Urbano veshin kostumet e pulëbardhave për dy paraqitje gjatë ekspozitës duke i ftuar vizitorët në hapësirë si skulptura.

Ato përfaqësojnë krijesa nga laguna e Venecias, të cilat vëzhgojnë ekosistemin nga lart. Janë pulëbardhat ato që koordinojnë performancën e përbashkët, duke e bashkuar veprimin kolektiv të krijesave.

Ekipi kuratorial i Audemars Piguet Contemporary ka punuar prej së afërmi me Halilajn dhe Urbanon për ta zhvilluar dhe mbështetur krijimin e instalacionit të bashkë-komisionuar. Dyshja e cila bashkëjeton në Berlin, i ka praktikat artistike të ndara.

Ky projekt është mundësi e veçantë për ta parë punën e artistëve të cilët janë bashkuar për të krijuar një instalacion të tillë. Ashtu si në veprat e mëparshme, ky instalacion eksploron dhe negocion hapësirën mes dy realiteteve: botës njerëzore dhe asaj natyrore. Praktikat artistike të të dy artistëve përshkohen nga elemente personale dhe lozonjare që vënë në pyetje normat shoqërore.

“Këto vepra e turbullojnë kuptimin tonë binar të botës. Një hënë në formë vezeje, krijesa ujore që bëhen tokësore dhe ajrore, apo një orkestër që luan një simfoni e që del nga ujërat dhe sinkronizohet me ciklin e hënës; kjo e shumë storie të tjera e krijojnë ekspozitën tonë në Ocean Space. Instalacioni kumbon një këngë fëmijësh, ku peshqit e vegjël ndjekin mësimet në një shkollë në fund të detit për të mësuar format e rezistencës.”, thanë dy artistët

Artistët

“Ka qenë kënaqësi e vërtetë ta shoqëroja zhvillimin e instalacionit të ri, Ansambli Hënor për Dete të Rrëmbyera, i ideuar nga Petrit Halilaj dhe Álvaro Urbano me ndihmën e studios së tyre në Berlin, e poashtu të bashkëpunonim me ekipin kuratorial të Audemars Piguet Contemporary. Nga Ocean mund të mësojmë se marrëdhënia mes qenieve të gjalla dhe ekosistemeve është e shumëfishtë, fluide, e gjithnjë në ndryshim. Përshtatja me këtë lëvizje është thelbësore, në mënyrë që ta imagjinojmë dhe ndërtojmë një të ardhme alternative. Artistët na ftojnë t’i sinkronizojmë veprimet tona drejt një praktike e formave të reja të të qenit bashkë.” Barbara Casavecchia

Kuratore e ‘Kështu dallgët në Dyshe Vijnë’ në TBA21–Academy

“Ka qenë nder të bashkëpunoja me artistët Petrit Halilaj dhe Álvaro Urbano në këtë instalacion gjithëpërfshirës dhe interaktiv. Ata ju qasen temave të transformimit dhe përkatësisë, duke e mishëruar konceptin se kur ‘asgjë nuk shkon dëm’, gjithçka transformohet. Jemi shumë të kënaqur që kemi punuar bashkë në këtë projekt me Barbara Casavecchia dhe TBA21–Academy, në një program që përputhet me përkushtimin tonë për të mbështetur artistët në zhvillimin e tyre krijues, me besimin e përbashkët se arti mund të ofrojë perspektiva dhe mënyra të reja të të menduarit rreth botës tonë.” Audrey Teichmann

Kurator Arti, Audemars Piguet Contemporary

“Kërko Përtej”

Rreth Petrit Halilaj dhe Álvaro Urbano

Petrit Halilaj (l. 1986, Kostërrc-Skenderaj, Kosovë) dhe Álvaro Urbano (l. 1983, Madrid, Spanjë) janë artistë vizuelë të cilët veprojnë në Berlin. Praktika e Halilajt del nga përvojat e tij personale, duke reflektuar mbi kujtimet, liritë dhe identitetet kulturore individuale dhe kolektive dhe vepra e Urbanos fton dialog midis entiteteve të ndryshme të gjalla për të krijuar mjedise të reja. Duke punuar kryesisht veçmas, praktika e tyre e përbashkët kombinon aspekte specifike të interesave të secilit artist dhe plotëson hulumtimin e njëri-tjetrit. Krijimi i tyre i përbashkët reflekton mbi dikotominë midis mjediseve të ndërtuara dhe natyrës, dhe mbi mundësitë e negocimit midis këtyre dy realiteteve. Halilaj dhe Urbano së bashku morën pjesë në rezidencat e artistëve në MAK Residency, Los Angeles (2016-2017) dhe në Villa Romana, Firencë (2014). Bashkëpunimet e tyre janë ekspozuar edhe në hapësira si: Palacio de Cristal, Madrid; Biblioteka Kombëtare e Prishtinës, Autostrada Biennale; Brücke-Museum, Berlin; MAK Qendra për Art dhe Arkitekturë, Mackey Apartments, Los Angeles; PAC-Pavijoni i Artit Bashkëkohor, Milano; S.A.T.L.S., Bazel; Bundeskunsthalle, Bon; Villa Romana, Firencë. Që të dytë janë profesorë në Ecole Nationale Supérieure des Beaux Arts de Paris, Francë. Puna e tyre është përfshirë në Colección Jumex, Mexico City. Artistët përfaqësohen bashkërisht nga ChertLüdde, në Berlin. Halilaj përfaqësohet nga ChertLüdde, Berlin; kurimanzutto, Mexico City/Nju Jork; dhe Mennour, Paris. Urbano përfaqësohet nga ChertLüdde, Berlin; dhe Travesía Cuatro, Mexico City/Guadalajara/Madrid.

Rreth TBA21–Academy

TBA21–Academy është ekosistemi kulturor i TBA21 që nxit një marrëdhënie më të thellë me Oqeanin dhe trupat më të gjerë të ujit përmes prizmit të artit për të frymëzuar kujdesin dhe veprimin, duke bashkuar morinë e zërave dhe historive rreth oqeanit dhe jo vetëm. Për më shumë se një dekadë, Akademia ka qenë një inkubator për hulumtimin bashkëpunues, prodhimin artistik dhe forma të reja të dijes që ndërthurin artin dhe shkencën. Praktikat dhe metodologjitë e TBA21–Academy bazohen në besimin se një përgjigje kulturore është e nevojshme për të zhvendosur paradigmat drejt të menduarit më imagjinativ dhe rigjenerues.

Në vitin 2019, TBA21–Academy inauguroi Ocean Space në Venecia, një qendër planetare për ekspozita, hulumtime dhe programe publike që katalizojnë shkrim-leximin kritik të oqeanit përmes arteve. Nëpërmjet programit të saj të larmishëm, TBA21–Academy ka ndërtuar tash e sa një komunitet lokal dhe ndërkombëtar vibrant dhe dinamik në Venecia dhe më gjerë.

Në vitin 2023, ekspozita dhe programi publik në Ocean Space është konceptuar nga Barbara Casavecchia si pjesë e bursës kuratoriale The Current III (2021–2023), duke u nisur nga Mesdheu si një ushtrim transdisiplinor dhe transrajonal në ndjesinë e të menduarit dhe të mësuarit - duke mbështetur projekte pedagogjike kolektive dhe zëra përgjatë brigjeve të Mesdheut në ruajtjen dhe aktivizmin e shkencës së kulturës së artit. Organizuar nga TBA21–Academy si një program trevjeçar i bursave kuratoriale, The Current është një iniciativë pioniere që kultivon praktika transdisiplinore dhe shkëmbimin e ideve rreth trupave ujorë dhe të kuptuarit e tyre. The Current përpiqet të eksplorojë dhe të bashkëkrijojë baza të përbashkëta midis disiplinave të ndryshme në lidhje me Oqeanin përmes mjeteve të afërsisë, kërkimit bashkëpunues dhe angazhimit afatgjatë. - https://tba21.org/academy

Rreth Audemars Piguet Contemporary

Audemars Piguet Contemporary porosit artistë ndërkombëtarë për të krijuar vepra arti bashkëkohor, duke nxitur një komunitet global krijuesish. Marka beson në fuqinë e artit bashkëkohor për të bashkuar dhe për t'u bashkuar.

Audemars Piguet Contemporary angazhohet dhe porosit artistë të krijojnë vepra të reja në një sërë shkallësh dhe mediash, të cilat mund t'u mundësojnë atyre të eksplorojnë territore të reja në praktikën e tyre. Ekipi shoqëron çdo proces komisioni nga fillimi në zhvillimin e deri te ekspozita dhe krijon përvoja për audiencën që të angazhohet me punën në mbarë botën.

Veprat e artit që rezultojnë u përkasin artistëve dhe kontribuojnë në punën e tyre. Ashtu si me orët mekanike, veprat e porositura të artit janë më shumë se ajo që shohim. Këto vepra janë të ndjeshme ndaj botës sonë që është në ndryshim të vazhdueshëm. Ato janë mundësi për krijim të rii, duke bashkuar audiencën dhe duke krijuar në bashkëbisedime që shkojnë përtej përshtypjeve të para.

Që nga viti 2012, artistët pjesëmarrës të Audemars Piguet Contemporary përfshijnë Andreas Angelidakis, Meriem Bennani, Aleksandra Domanović, Cao Fei, Ryoji Ikeda, Yu Ji, Alexandra Pirici, Tomás Saraceno, Jana Winderen dhe Sun Xun. Veprat e artit të porositura janë prezantuar në mbarë botën në vendet kryesore që përfshijnë Azinë (Art Basel, Hong Kong; Qendra UCCA për Artin Bashkëkohor, Pekin), Evropë (180 The Strand, Londër; Ars Electronica, Linz; Art Basel, Basel; Espace Niemeyer, Paris; Shtëpia e Arteve Elektronike, Bazel; Ekspozita Ndërkombëtare e Artit - La Biennale di Venezia; Kunstmuseum Wolfsburg; MAXXI, Romë; Palais de Tokyo, Paris) dhe Shtetet e Bashkuara (Art Basel, Miami; High Line, Nju Jork; Times Square Arte, Nju Jork). –

https://www.audemarspiguet.com...

Rreth Audemars Piguet

Audemars Piguet është prodhuesi më i vjetër i orëve të shkëlqyera ende në duart e familjeve të tij themeluese (Audemars dhe Piguet). Me bazë në Le Brassus që nga viti 1875, kompania ka ushqyer breza të artizanëve të talentuar, të cilët kanë zhvilluar vazhdimisht aftësi dhe teknika të reja, duke zgjeruar savoir-fairin e tyre për të vendosur tendencat për thyerjen e rregullave. Në Vallée de Joux, në zemër të Jura-s zvicerane, Audemars Piguet ka krijuar kryevepra të shumta, testament për shpirtin stërgjyshëror të prodhimit dhe mendimit progresiv. Duke shtyrë kufijtë e asaj që është e mundur dhe duke ndërtuar ura midis botëve të ndryshme krijuese, Audemars Piguet ka qenë në gjendje të eksplorojë horizonte të reja dhe të ndërtojë një komunitet të frymëzuar. Seek Beyond.—www.audemarspiguet.com<...