Trumpi thotë prapë se Netanyahu duhet të falet: Presidenti i Izraelit duhet të turpërohet nga vetja
Presidenti i Shteteve të Bashkuara, Donald Trump, tha të enjten se kryeministrit izraelit, Benjamin Netanyahu, duhet t’i jepet falje zyrtare për akuzat për korrupsion.
Kreu i Shtëpisë së Bardhë tha se presidenti i Izraelit, Isaac Herzog, duhet “të turpërohet nga vetja” që nuk e ka falur ende Netanyahun, raporton agjencia e lajmeve “Reuters”.
Presidenti amerikan tha se Netanyahu ka qenë kryeministër i mrekullueshëm në kohë lufte dhe se populli izraelit duhet ta turpërojë presidentin që nuk e ka falur Netanyahun. “Ai është i turpëruar që nuk po e jep këtë [falje]. Duhet ta japë” – tha Trumpi në një ngjarje të organizuar në Shtëpinë e Bardhë.
Netanyahu u takua me Trumpin në Uashington të mërkurën. Ky ishte takimi i shtatë mes dy udhëheqësve që nga koha kur presidenti amerikan u rikthye në Shtëpinë e Bardhë vitin e kaluar. Ata biseduan rreth një marrëveshjeje për programin bërthamor dhe raketat balistike të Iranit.
Netanyahu është kryeministri i parë në pushtet i Izraelit që ngarkohet me akuzën për një krim. Ai i mohon akuzat për ryshfet, mashtrim dhe shkelje të besimit, të cilat datojnë nga një aktakuzë e ngritur në vitin 2019.
Trumpi i ka bërë thirrje publikisht homologut izraelit disa herë që ta falë Netanyahun dhe në fund të dhjetorit tha se Herzogu i kishte thënë se falja për kryeministrin ishte afër. Megjithatë, zyra e presidentit izraelit e kishte demantuar shpejt presidentin amerikan.
Sipas ligjeve izraelite, presidenti gëzon autoritet për t’ua falur dënimet të dënuarve. Megjithatë, nuk ka ndonjë precedent për lëshimin e faljes në mesin e procesit gjyqësor.
