Të paktën 11 persona u vranë, shënjestër komuniteti hebre në Australi: Çka dihet deri tash për sulmin në plazhin Bondi?

Të paktën 11 persona janë vrarë në një sulm me armë zjarri që ka shënjestruar komunitetin hebre në plazhin Bondi të Australisë, njoftojnë policia. Sulmi ndodhi ndërsa qindra persona ishin mbledhur për të festuar ditën e parë të Hanukës, dhe është shpallur incident terrorist.

Viktimat përfshijnë edhe një shtetas izraelit, sipas ministrisë së jashtme të atij vendi, raporton CNN.

Kryeministri australian Anthony Albanese e përshkroi sulmin si “një akt të së keqes, antisemitizmit, terrorizmit që ka goditur zemrën e kombit tonë” dhe tha se “një sulm ndaj hebrenjve australianë është një sulm ndaj çdo australiani.”

Zyrtarët izraelitë reaguan me tmerr dhe zemërim, me disa që akuzuan qeverinë australiane për lejimin e një rritjeje të antisemitizmit. - Policia gjithashtu konfirmoi se ka dy të dyshuar të njohur, njëri është i vdekur ndërsa tjetri ndodhet në gjendje kritike në spital. Oficerët kanë siguruar dhe hequr pajisje shpërthyese të gjetura në një automjet aty pranë.

Është afër orës 5 të mëngjesit në Sidnei, ku dielli së shpejti do të lindë një ditë pas një sulmi fatal me armë zjarri në plazhin e famshëm Bondi të Australisë, shkruan CNN.

Të paktën 11 persona u vranë në sulm, ndërsa 29 të tjerë u plagosën, sipas policisë. Një vajzë 12-vjeçare dhe një rabin janë mes viktimave, tha për CNN Alexander Ryvchin, bashkëdrejtues ekzekutiv i Këshillit Ekzekutiv të Hebrenjve të Australisë.

Ja çfarë dimë për sulmin:

Sulmi filloi rreth orës 18:37 me kohën lokale, tha policia, kur dy individë hapën zjarr ndaj një “grupi të mbushur me familje” në plazhin Bondi.

Më shumë se 1,000 persona ishin mbledhur në një aktivitet të Hanukës në plazh që kishte filluar më pak se dy orë më parë. Policia tha se sulmuesit kishin shënjestruar qëllimisht komunitetin hebre.

Pamjet treguan një kalimtar që e rrëzoi dhe i mori armën njërës prej sulmuesve.

Ai u vlerësua si një “hero i vërtetë” nga Kryeministri i Shtetit të Uellsit të Ri Jugor, Chris Minns. - Njëri nga dy sulmuesit u qëllua për vdekje në vendngjarje, ndërsa tjetri u mor në kujdesin e policisë në gjendje kritike, tha policia. Një pajisje shpërthyese u gjet në një makinë të lidhur me sulmuesin e vrarë.

Sulmi u shpall incident terrorist nga policia në orën 21:36 me kohën lokale, thanë autoritetet.

Për sulmin kanë reaguar liderë nga e gjith bota.