Ish-kryeministri grek 'nuk është i sigurt' se SHBA dëshiron t'i japë fund luftës në Ukrainë
Uashingtoni luan një rol vendimtar në adresimin e krizës në Ukrainë, por motivimi i tij për t'i dhënë fund luftës nuk është i qartë, ka thënë ish-kryeministri konservator, Kostas Karamanlis.
Deklarata e tij vjen mes një përplasjeje të ashpër në politikën greke mbi vendimin e partisë në pushtet Demokracia e Re (EPP) për të dërguar më shumë armë në Ukrainë pa informuar parlamentin. Grekët e mësuan lajmin nga kancelari gjerman Olaf Scholz pasi ai bëri publike marrëveshjen për shkëmbim armësh me Athinën.
Ndërkohë, Berlini pranoi se marrëveshja ishte bërë mes dy liderëve në margjinat e samitit të BE-së.
Karamanlis, kryeministër i Greqisë gajtë viteve 2004 - 2009, është ende figurë me ndikim në partinë konservatore greke. Gjatë qeverisjes së tij, ai bëri një politikë të jashtme "të ekuilibruar" midis Uashingtonit dhe Moskës, diçka që nuk u pëlqeu amerikanëve.
“Shtetet e Bashkuara me të vërtetë kanë dhënë një kontribut vendimtar, si në trajtimin e krizës ashtu edhe në mbështetjen e Ukrainës. Megjithatë, nuk është e qartë nëse ata kanë motive po aq të forta për t'i dhënë fund luftës, pasi, në fakt, ata nuk i vuajnë pasojat e dhimbshme, të paktën në të njëjtën masë [me Evropën]”, tha Karamanlis, raporton Euractiv.
Karamanlis këmbënguli se përfundimi i luftës është urgjent, pasi të gjithë ata që janë përfshirë – kryesisht Ukraina – vetëm do të humbasin.
“Dhe autori [Rusia], i cili pavarësisht nga rezultati i diskutueshëm ushtarak, numëron humbje dhe dëme të mëdha”, tha ai.
Të gjitha partitë e opozitës akuzojnë kryeministrin aktual grek Kyriakos Mitsotakis se po bën politikë të jashtme në mënyrë të fshehtë pa informuar partitë e tjera politike dhe duke e angazhuar vendin në ujëra të paeksploruara kur bëhet fjalë për çështjet e jashtme.
Artikulli kryesor i faqes së lajmeve News247 të enjten kritikoi qeverinë duke thënë se “Politika e jashtme greke është në errësirë”.
Opozita reagoi pasi kancelari gjerman Olaf Scholz bëri publike një marrëveshje shkëmbimi armësh me Athinën për t'i dorëzuar armët Ukrainës pas samitit të BE-së.
Megjithatë, nuk është e qartë pse Scholz e bëri publike marrëveshjen, ndërsa Mitsotakis preferoi të mos e bënte.
I pyetur se pse grekët mësuan nga Scholz për marrëveshjen, zëdhënësi i qeverisë greke Ioannis Oikonomou tha për Skai TV se udhëheqësi gjerman e bëri njoftimin "mes një diskutimi të vazhdueshëm midis dy palëve".
Megjithatë, pala gjermane ka një qëndrim tjetër duke pretenduar se marrëveshja ishte finalizuar tashmë në takimin mes Scholz dhe Mitsotakis.
