EKSKLUZIVE: Flet për Nacionalen avokatja e djalit të Mefail Shkodrës që u dërgua në mbajtje
Enis Shkodra, djali i Mefail Shkodrës, njeriut që gjendet në arrati bashkë me dy djemtë tjerë, Engjëll Shkodrën dhe Edonis Shkodrën, pas vrasjes së trefishtë në Gjilan – ishte shoqëruar në Polici.
Lirije Kovani, avokatja e Enis Shkodrës, djalit të Mefail Shkodrës, ka treguar ekskluzivisht për Nacionalen, se si u lirua sot Enis Shkodra pas ndalimit 48 orësh.
Ajo rrëfen se si ishte njoftuar Enis Shkodra për rastin që ndodhi të dielën në Gjilan dhe se si alibia e tij ishte, se në ato momente, ai ndodhej në një nga restorantet e Gjilanit, në një aheng, siç thotë avokatja “duke ushtruar profesionin e tij si kameraman’.
“Shprehi ngushëllimet për familjarët e viktimave, për rastin tragjik të së dielës. Fillimisht të sqaroj për opinionin publik, që kam qenë mbrojtëse e njërit prej anëtarëve të familjes së ngushtë.
I njëjti ka alibi se në kohën kur ka ndodhur rasti, i njëjti ka qenë duke bërë video-xhirime në një aheng familjar në një nga restorantet e komunës së Gjilanit.
Ai është njoftuar nga nëna e tij për rastin që ka ndodhur dhe me të arritur në vendin e ngjarjes i njëjti i dëgjon njerëzit që flasin për rastin dhe për një moment, zyrtarët policorë e pyesin se kush është, i njëjti tregon se kush është dhe e marrin, e fusin në veturë zyrtare.
Me vendim të prokurorit, i njëjti intervistohet nën dyshimet për involvim në veprën penale, por më pas dëshmohet se i njëjti nuk ka qenë i involvuar në veprën penale”, thotë ajo.
INTERVISTA E PLOTË:
Oqean Dërmaku: A është pyetur nga zyrtarët policorë se a ka qenë në dijeni për rastin dhe se a ka dijeni nëse familja e tij ka pasur problem me tash viktimat?
Avokatja Lirije Kovani: Po, është pyetur nga zyrtarët policorë dhe ka dhënë detaje të mjaftueshme se nuk ka njohuri nëse anëtarët e familjes kanë pasur problem me viktimat dhe personalisht nuk i ka njohur vviktimat.
Oqean Dërmaku: Do të thotë ai kishte alibi që nuk ka qenë në vendin e ngjarjes dhe nuk ka qenë në dijeni për rastin. Sot është liruar, a po?
Lirije Kovani: I njëjti ditën e dielë është ndaluar për 48 orë, mirëpo dje është mbajtur seancë në Prokurorinë Themelore në Gjilan. I njëjti në detaje ka sqaruar se çka ka njohuri për këtë vepër dhe i njëjti me prova të bazuara dëshmon se nuk ka qenë në vendin e ngjarjes.
Andaj prokurori i shtetit, me procedurë të rregullt e ka liruar sot.
Oqean Dërmaku: Pas lirimit, a keni arritur të dëgjoheni me familjarët që janë këtu, pasi tre persona tashmë janë në arrati?
Lirije Kovani: Po, pas daljes së klientit tim nga qendra e ndalimit në Gjilan, më ka telefonuar dhe ndjen pendesë shumë të madhe për rastin që ka ndodhë po ashtu edhe familjarët ndjejnë shumë keqardhje për rastin që ka ndodhur.
